Rani og Aron til EM í amboðsfimleiki

Teir báðir bestu mansfimleikararnir vit hava í Føroyum, Rani A. Dalsgarð og Aron D. Jacobsen, eru farnir til München í Týsklandi at umboða Danmark til EM í amboðsfimleiki.

Fyrireikingarvenjing ella podiumvenjing var í gjár, og kappingin hjá monnunum byrjar hósmorgunin klokkan 9 føroyska tíð. Aron skal kappast í øll amboðum (allround) og Rani fer at kappast á gólvi, skrivar Fimleikasambandið á heimasíðuni.

Rani og Aron hava sín uppruna í HF og Rani er har enn. Aron venur í Danmark hjá Gefion, nú hann gongur í skúla í Keypmannahavn.  

Sum nakað nýtt er EM góðkenningin til HM, sigur Fimleikasambandið.