Saksaspark og dundurskot gjørdu av við Víking

Var uppgávan hjá Víkingi trupul í kvøld, so verður hon upp aftur truplari ólavsøkudag. 

Víkingur tapti í kvøld 2-0 móti slovakiska DAC 1904 Dunajská Streda á Tórsvølli. Longu aftaná sjey minuttir løgdu gestirnir seg á odda við vøkrum saksasparki.

Heimaliðið vann seg inn aftur í dystin, men málmøguleikarnir vóru allir misnýttir. Í 81. minutti svav Víkingaverjan og rakti ikki bóltin sum gav Andrejs Ciganiks møguleikan at smekka bóltin í kassan.

Tvey flott mál hjá gestunum, meðan Víkingur einki fekk.

Returdysturin verður leiktur ólavsøkuaftan, 28. juli. Tað verður á DAC Arena í Dunajska Streda har vestri í Slovakia.