Spurningurin um leikbann er til viðgerðar

Mánakvøldið varð kunngjørt í 3-2, at nógv umrødda støðan í Klaksvík kann fáa eitt eftirspæl. Í øllum førum hevði EB/Streymur tá sent skriv til FSF um støðuna, har Árni Frederiksberg klípti Meinhard Geyti í neðra, har høgri bakkurin hjá EB/Streymi so svaraði aftur við einum sparki.

Meinhard fekk reytt kort, men Heini Ziskason Viðoy sá ikki, hví EB/Streyma spælarin gjørdist illur, hóast altjóða dómarin stóð í góðari støðu. Støðan sæst púra greitt á upptøkunum hjá Televarpinum.

Sigfríður Clementsen gjørdist eisini rættiliga illur, og venjarin hjá EB/Streymi varð burturvístur fyri at brúka seg. Í støðuni vísti hann eisini bæði vinstru og høgru longutong inn á vøllin og ímóti dómaranum - nakað sum varð fangað á myndum og deilt á serliga sosialu miðlunum. 

Í viðtalu við FM1 sunnudagin settii Sigfríður Clementsen orð á støðurnar og viðurgekk, at hann sjálvur fór ov langt.

Av tí at Meinhard Geyti og Sigfríður Clementsen fingu reytt kort, so kemur longdin av teirra leikbannum at vera avgjørd av dómarafrágreiðingini. 

Tað er trupult at fara at spáa um, hvat hetta endar við, men um hugt verður eftir vegleiðing um leikbann hjá FSF, so fellur tað hjá Meinhard Geyti helst undir "Leikbann 2 Dystir" - serliga tá hann varð ertaður áðrenn. 

Viðvíkjandi venjarum so er vanliga revsingin fyri burtuvísing ein dystur burtur frá síðulinjuni. Um ófantaliga teknið við fingrinum gevur meira verður helst greitt í vikuni.

Í løtuni standa leikbannini hjá spælara og venjara at vera ein dystur hvør á Comet-skipanini og vera teir ikki tøkir í morgin. Sum skilst er tað ikki endaliga avgjørt enn, um tað verður meira enn tað.

Sí eisini: Viðmerkjari: - Hví kunnu hesir fótbóltsspælararnir ikki bara spæla fótbólt

So er stóri spurningurin, um Árni Frederiksberg fær revsing fyri hendingina. 

Portalurin hevur fingið váttað frá fleiri, at málið framvegis er til viðgerðar í Fótbóltssambandinum.  

Tað kann enda í Aga- og Etiskunevndini, og sum skilst kunnu videoupptøkur nýtast sambært nýggju viðtøkunum.

Harvið kann lyklaspælarin hjá KÍ enda við at fáa eitt leikbann í fleiri dystir. Tað er ikki greitt, nær ein avgerð fellur í málinum. KÍ spælir á Toftum í morgin, og Árni Frederiksberg er sum nú er tøkur.

Sí vegleiðing um leikbann her