Støkk vunnið heiður í Italia

Hesa vikuna hevur Fimleikafelagið Støkk luttikið á Festival del Sole í Riccione í Italia. 

Í gjár var endahátíðin í sambandi við festivalin hildin á stóra pallinum, har fleiri túsund áskoðarar vóru til staðar.

Støkk, sum luttók við heili 70 leikarum, framførdi á pallinum, og eftir framførsluna vann Støkk ein heiður fyri at vera tað liðið, sum hevði flest fimleikarar við í framførsluni í mun til íbúgvaratalið, skrivar fimleikafelagið í tíðindaskrivi.

– Tað er stuttligt at kunna umboða Føroyar á henda hátt, siga tey í Støkk og leggja afturat, at tey eru errin av heiðrinum, sum varpar ljós á breiddarfimleikin og felagsskapin.