Agnar Prestá
-Fýra, fýra, fýra, fýra null....
NSÍ hevur í kvøld framt ein av teimum stóru evropeisku úrslitunum hjá føroyskum feløgum.
Gamaní var HJK Helsinki í undirtali tríggjar fjórðingar av dystunum - eftir reyða kortið í 23. minutti - men áðrenn tað hevði NSÍ leiðsluna og tamarhald, og aftaná løgdu teir í gulum og svørtum í krovið á finnum og skaptu eitt hav av málmøguleikum.
Les meira um 1. hálvleik her: NSÍ í dreymastøðu við Djúpumýru
Tað varð 2-0 fyri steðgin, og í 2. hálvleiki hevði NSÍ einar 5-6 heilt stórar málmøguleikar. Tann seinasti neyvleikin vantaði í summum førum, men spælið var ógvuliga gott, og tvær ferðir eftir stegðin bragdaði.
Í báðum førum vóru tað flottir stútarar eftir framúr innlegg frá Jann Benjaminsen: Daniel Obbekjær og Klæmint Andrasson Olsen skoraðu málini og syrgdu harvið enaliga fyri flottum 4-0 sigri.
Fantastisku Guliganz og hinir áskoðararnir hugnaðu sær - onkur trúði næstan ikki sínum egnum eygum.
HJH Helsinki megnaði ikki at standa ímóti og skal finna nakað heilt annað fram í Finnlandi. Tá verður tað, helst, ellivu móti ellivu allan dystin og undir øðrum umstøðum, men liðið hjá Jens Wedeborg hevur skapt sær eitt framúr útgangsstøði til at koma víðari í Conference League.
Conference League 1. umfar
Hósdagin 10. juli, við Við Djúpumýru
NSÍ - HJK Helsinki 4-0 (2-0)
12' Emil Weihe Joensen 1-0
35' Fabian Østigaard Ness (Brandur Hendriksson Olsen) 2-0
76' Daniel Obbekjær (Jann Benjaminsen) 3-0
83' Klæmint Andrasson Olsen (Jann Benjaminsen) 4-0
Reytt kort: Jere Kallinen (23')
NSÍ (4-3-3): Kristian Joensen - Jann Benjaminsen, Daniel Obbekjær, Lars Markmanrud, Fabian Ness - Michal Przybylski, Brandur Hendriksson Olsen, Emil Weihe Joensen - Jasper van der Heyden, Klæmint Andrasson Olsen, Aron Knudsen
Vinarliga broyt tínar kennifíla - og privatlívsstillingar fyri at síggja hetta innihald