Stórhøll skal verða liðug um tvey ár

Høllin er teknað, staðsetingin er komin upp á pláss og kostnaðurin er eisini komin upp á pláss.

Tað segði Heðin Mortensen, borgarstjóri í Tórshavnar kommunu, við útvarpið í kvøld.

Prát hevur verið um stórhøll í fleiri ár, og nú er okkurt sum bendir á, at hetta verður veruleiki. Sambært borgarstjóranum, skal høllin standa klár um eini tvey ár.

Ætlanin er at byggja hana við Stórutjørn í Hoyvík. Høllin skal hýsa 3000-4000 fólkum til hondbóltsdyst, og skal eisini kunna nýtast til konsertir, samkomur og annað.

Kostnaðurin er umleið 217 milliónir krónur, upplýsti Heðin Mortensen, borgarstjóri, fyri útvarpinum.

- Tað sær øgiliga positivt út. Tað skal undra meg øgiliga nógv um vit ikki klára at fáa hetta ígjøgnum, segði borgarstjórin.

Sum skilst er áhugi frá grunnum og privatum fyritøkum, og tí stendur høvuðsstaðarkommunan ikki einsamøll við íløguni. Heðin Mortensen væntar, at Tórshavnar kommuna fer at rinda 80-100 milliónir av verkætlanini.

Á Strondum er ein áhugabólkur eisini í holt við verkætlan um stórhøll. Lagt verður upp til at landið rindar 70 prosent av verkætlanini, og kommunan restina. Stórhøllin á Strondum verður mett at kosta millum 80 og 100 milliónir.

Stórhøll á Strondum