Stórur dagur hjá AB og TB

15. umfar í Betrideildini varð leikt seinnapartin, og tríggir dystir vóru á skránni.

Lagt varð út í Fuglafirði, har Varmakelda er á skránni, og B36 var á vitjan. Eins og í Sarpugerði síðsta vikuskifti, helt ÍF nullið meginpartin av fyrra hálvleiki, men so gekk tað galið. B36 skoraði heili tríggjar ferðir seinastu tíggju minuttirnar, og tað endaði eisini 0-3 í Fuglafirði. B36 vann seg harvið fyribils upp á 3. plássi - fuglfirðingar taptu níggjunda dystin á rað og eru í trupulleikum

Hin uppflytarin er komin í eina góð gongd undir Tummas Erlingi Djurhuus. TB vann í dag fyri triðju ferð seinastu fýra dystirnar, tá B68 var við Stóra. Liðið hjá Jákupi á Borg vann har fyrr í ár og vann 3-0 á EB/Streymi mikudagin. Bæði vóru tó í steypakappingini - í Betrideildini er B68 í niðurflytingarvanda. Útiliðið fekk javnað til 1-1 eftir ein tíma, men TB fekk 2-1 málið fimm minuttir fyri leiklok. Samudeen Musah var stóri maðurin við Stóra við tveimum málum. TB spælir nú aftur uttan Gilla Rólantsson Sørensen og er á 6. plássi.

Samudeen Musah skoraði eisini í sigrinum á AB á Jóansøku. Fyrra málið í dag varð eftir returbólt uppá brotsspark, ið hann sjálvur skeyt. 2-1 málið kom í 86. minutti (Savnsmynd: Sverri Egholm)

Á Argjum dømdi Petur Reinert sín seinasta dyst í Betrideildini, tá AB fekk sigur nummar tvey í ársins landskapping í hús. 07 Vestur hevur annars verið væl koyrandi seinastu tíðina, men argjamenn fingu bæði málini í dystinum. Tað fyrra gjørdi Brian Jakobsen í 70. minutti, og í yvirtíðini dømdi Petur sítt seinasta brotsspark í bestu mansdeildini. Bjarni Skála umsetti tað til mál. Ógvuliga týdningarmikil stig hjá AB, ið nú er nærri strikuni.

Felagið setir helst nýggjan fastan venjara í summar. Tað hevur 07 Vestur longu gjørt: Eftir dystin varð boðað frá, at Micheal Schjønberg hevur sagt seg úr starvi av persónligum ávum, og at royndi norðmaðurin Lars Arne Nilsen tekur við.

Tveir teir síðstu dystirnir í umfarinum verða spældir í morgin EB/Streymur tekur móti Víkingi, og KÍ og HB bresta saman í arvafíggindauppgerð í Klaksvík. Tey seks liðini, sum hava spælt í dag, hava summarfrí frá Betrideildini í nakrar vikur.

Betrideildin 15. umfar
Í dag leygardagin, 01.07

ÍF - B36 0-3 (0-3)
37' Magnus Egilsson (br.) 0-1
41' Taufee Skandari 0-2
45' Sonni Ragnar Nattestad 0-3

TB - B68 2-1 (1-0)
55' Samudeen Musah 1-0
60' Áki Johannesen 1-1
86' Samudeen Musah 2-1

AB - 07 Vestur 2-0 (0-0)
79' Brian Jakobsen 1-0
90 (+4) Bjarni Skála (br.) 2-0

Í morgin, sunnudagin 02.07
15.00: 
KÍ - HB
EB/Streymur - Víkingur

Støðan: 

1. KÍ 45 stig 
2. B36 36 stig *
3. HB 35 stig 
4. Víkingur 24 stig 
5. 07 Vestur 22 stig
6. TB 15 stig 
7. EB/Streymur 13 stig **
8. B68 11 stig
9. ÍF 9 stig
10. AB 7 stig 

* Ein dyst fleiri
** Ein dyst færri

Rættað og dagført: 18.49