Sverri í A-finaluni í dag

Í hesum døgum luttekur miðvingurin Sverri Sandberg Nielsen á World Cup-stevnu í Lucerne í Sveis, og seinnapartin rør hann í A-finaluni í einskullara hjá monnum.

Fríggjadagin gjørdist Sverri nummar tvey í innleiðandi róðrinum og í fjórðingsfinaluni, og í gjár endaði hann aftur á øðrum plássi í hálvfinaluni.

Í A-finaluni, sum verður klokkan 13.13 føroyska tíð, skal Sverri kappast ímóti bulgarska Kristian Vasilev, niðurlendska Simon Van Dorp, hvítarussiska Yauheni Zalaty, sum luttekur undir uttanveltaðum flaggi, nýsælandska Thomas Mackintosh, og týska Oliver Zeidler.

A-finalan kann stroymast her.