TB megnaði einki ímóti Fleyr í oddadystinum

Undan dystinum í gjár vóru bæði Fleyr og TB ósigrað, men Fleyr var tó eitt stig frammanfyri á stigatalvuni, tí TB hevði einans fingið tvey stig í 3-2 sigrinum á KÍF, men við sigri á Fleyr í gjár hevði TB møguleikan at leggja seg á odda í Hotel Djurhuus-deildini. So skuldi tó ikki verða, tí Fleyr vann tryggan 3-0 sigur, og bert eitt stutt skifti í øðrum setti megnaði TB at bjóða av.

Fleyr sprakk avstað í fyrsta setti og legði seg á odda 6-1 og 11-4, og tann munurin bara vaks, til Fleyr hevði vunnið 25-14.

Fleyr var eisini frammanfyri tað mesta av øðrum setti, men við fýra stigum á rað fór TB kortini framum 10-9. Fleyr vann sær tó leiðsluna aftur alt fyri eitt, og vann settið 25-20.

Eftir at TB hevði lagt seg á odda 2-0, vann Fleyr seks stig á rað og fór framum 10-4, og tann munurin helt sær restina av settinum, sum Fleyr vann 25-18.

Í dag hevur SÍ møguleikan at taka annaðplássið, vinna tær á Drátti í oyggjaruppgerðini, sum byrjar kl. 16 í Sørvági.

Støðan í Hotel Djurhuus-deildini:

Flogbóltssamband Føroya