Tríggir heimspartar deilast um HM 2030

Heimsmeistarakappingin í fótbólti í 2030 verður spæld í seks londum í trimum heimspørtum.

Talan er um HM-kappingina, sum verður hildin 100 ár eftir fyrstu HM-kappingina í Uruguay í 1930.

Altjóða fótbóltssamgongan, Fifa, boðar í dag frá, at grannalondini Portugal og Spania fáa kappingina saman við afrikanska landinum, Marokko, beint hinumegin Gibraltar-sundið inn til Miðjararhavið.

Men eftir sum at 100 árið fyri fyrstu HM-kappingina skal hátíðarhaldast, so er avgerð tikin um, at hava eitt hald í Montevideo, høvuðsstaðnum í Uruguay. Og í tí sambandinum er ætlanin, at teir fyrstu tríggir dystirnir í HM-kappingini skulu spælast í suðuramerikansku londunum Uruguay, Argentina og Paraguay.

Fyrsti dystur verður á leikvøllinum, har alt byrjaði fyri hundrað árum síðani – á søguliga Estádio Cantenário, sigur Fifa-forsetin Gianni Infantino í skrivi í dag.

Komandi HM-kapping í 2026 verður hildin í Kanada, USA og Meksiko.