U19: Føroyingar syftu sviar

Svenskur ítróttur hevur tað trupult við føroyskum ítrótti - íhvussu er hesa vikuna. Mikukvøldið sendi KÍ svenska meistaran út úr Champions League. Hetta var søguligt, og hetta var í Göteborg.

Óli Mittún býr og spælir til dagliga hondbólt í Göteborg. Í kvøld gekk 18-ára gamli úrmælingurin av álvara á odda og skoraði aftur 17 ferðir móti Svøríki, tá eitt stórt og glæsiligt kapittul afturat í føroyskari hondbóltssøgu varð skrivað. Føroyar hava ongantíð áður verið til HM-endaspæl fyri U19-landslið hjá monnum - nú eru okkara U19-dreingir víðari til meginumfarið í kappingini.

Ovfarakæti á toppskjúttanum og dagsins spælara Óla Mittún..


Mynd: Egin Tollaksson Kass


Og sanniliga eisini á áskoðarunum, ið gjørdu sítt (Mynd: Egin Tollaksson Kass)

Til tess var ein sigur eitt krav í kvøld, og Føroyar reistu seg av álvara eftir vónbrotið móti Iran: Onkutíð høvdu teir yvirvágina, og onkutíð høvdu okkara tað. Í steðginum var javnleikur, og ivamál um, hvørt Ísak Vedelsbøl kom innaftur ella ikki. Tað gjørdi sterki strikuspælarin, og føroyska álopsspælið koyrdi sum heild ógvuliga væl eftir steðgin - bæði í 7 móti 6 og "vanliga álopinum". Okkara skoraðu tjúgu mál í seinna hálvleiki, og eftir at tað hevði ligið meira til sviar, koppaði tað beint eftir miðjan seinna hálvleik.

Fýra svensk álop á rað kiksaðu: Trok, yvirleggjari og Sasha órógvaði. Síðani tóku Føroyar leiðsluna og sleptu henni ongantíð, hóast nógv stóð á og okkurt mistak var. Fantastisku føroysku áskoðararnir hjálptu væl til, Aleksandar Sasha Lacok hevði nakrar týðandi atgerðir saman við verjuni, Óli og hinir tóku ábyrgd í longu álopunum, og í síðsta minuttinum var greitt, at hetta fór at bera á mál.

Ein ógvuliga spennandi inntensur og eisini flottur hondbóltsdystur við nógvum larmandi áskoðarum á báðum síðum, har Føroyar vístu styrki og spældu seg víðari. Nógv flott mál og eisini framúr stríðsvilji frá liðnum hjá Hjalta Mohr Jacobsen og Djóna Gaard Joensen.


Hjalti Mohr Jacobsen fegnast saman vi spælarunum (Mynd: Egin Tollaksson Kass)


(Mynd: Egin Tollaksson Kass)

Sí fleiri myndir frá frálíka hondbóltsdystinum her

Mánadagin spæla Føroyar móti Týsklandi her, áðrenn Saudi Arabia er á skránni í seinna dystinum í høvuðsumfarinum. Síðani fáa vit at síggja, um úrslitini røkka til fjórðingsfinalu.

U19 HM-endaspæl, 3. umfar í bólkaspælinum
Leygardagin 5. august, Opatija:
Føroyar - Svøríki 34-31 (14-14)

Støðan í bólki H eftir 3. umfar: 
1. Iran 5 stig
2. Føroyar 4 stig
3. Svøríki 3 stig 
4. Burundi 0 stig

Dystargongdin:
5.min: 1-1
10 min: 3-4
15 min: 6-6
20 min: 7-9
25 min: 10-11
30 min: 14-14
35 min: 16-17
40 min: 20-20
45 min: 24-25
50 min: 28-26
55 min: 30-28
60 min: 34-31

Málskjúttar: 
Óli Mittún 17 (8) - Dagsins spælari
Óla Jákup Gaard Olsen 3
Rókur Ziskason 3
Tróndur Johnsson 3
Ísak Vedelsbøl 3
Niklas Gaard 2
Jákup Egholm 2
Aleksandar Sasha Lacok 1

Brend skot: 14 - Skoteffektivitetur: 71 prosent

Bjargingar:
Aleksandar “Sasha” Lacok 10

Útvísingar:
Føroyar: 3
Svøríki: 3

Tekniskar villur:
Føroyar: 9
Svøríki: 8