Upptakt: Føroyar skulu reisa seg á Tórsvøll

Lýsingarorðini um føroyska liðið vóru ikki allastaðni so mjúk eftir dystin hóskvøldið. Orð sum "skomm" og "katastrofa" vóru nýtt á sosialu miðlunum.

At tapa 3-0 á heimavølli móti Aserbadjan lá ikki í kortinum; dystargongdin samsvaraði heldur ikki heilt við úrslitið, men effektivitetur og kynisma var helst størsti munurin.

Les eisini: Effektiviteturin hjá Aserbadjan sigraði

Hóast tað hevur verið tungt, hevur liðið lagt dystin afturum seg. Eyguni vórðu vend ímóti nýggju uppgávuni: Kososvo. Sambært Lars Olsen er talan um truplari mótstøðu enn Aserbadjan. Kosovo er favorittur sambært veddingarfyritøkunum, og Føroyar taptu eisini niðri í Kosovo fyri einum mánaði, og tá var eingin ivi um, hvat betra liðið var. Um Føroyar skulu hava møguleika at vinna bólkin, skal ein sigur til í kvøld.

Tað er ikki endaliga váttað, men nógv bendir á, at Føroyar fara at spæla við nýggjari leikskipan. Hetta kom landsliðsvenjarin inná á tíðindafundinum í gjár. Tað verður møguliga skift til tríggar í miðverjuni, har Sonni Ragnar Nattestad, ið hevði leikbann til Aserbadjan-dystin, kemur inn í miðverjuna saman við liðformanninum Atla Gregersen og Odmar Færø, ið skaraði burturúr móti Aserbadjan.

Les meira: Lars Olsen: Umhugsa at broyta leiksskipan

Sí eisini: - Vildi býtt heiðurin um við trý stig
               - Eg hopi bara eg sleppi uppí

Liðskiparin hjá HB, Jógvan Rói Davidsen, er ikki tøkur vegna skaða.

FSF boðaði í morgun frá, at áleið 600 atgongumerki eru eftir. Føroyska liðið hevur tørv á stórum stuðli í dag, og tað er framvegi møguleiki at tryggja sær pláss á tjóðarleikvøllinum, ið tekur áleið 3500 áskoðarar.

Vit á Portalinum vera til staðar, og hava myndir og samandrátt frá dystinum. Eftir seiansta bríksl fáa vit fatur á viðmerkjingum.

Fyrsta bríksl á Tórsvølli verður klokkan 17.00. Føroyar framá!