Fótbóltur

Váttað: Sonni Djurhuus tekur við hjá TB

Talan verður um eitt lokalt venjaratoymi hjá uppflytarunum, har millum annað fyribils høvuðsvenjarin, Karl Øster, heldur fram.

2025-03-21 15:04

Agnar Prestá

Sum vit skrivaðu mikukvøldið, lá tað í kortunum, at Sonni Djurhuus skuldi taka yvir við Stóra. Hetta er nú kunngjørt.

TB skrivar í dag, at høvuðsvenjarin er uppá pláss. Talan er um 50-ára gamla Sonna Djurhuus úr Øravík, sum áður millum annað hevur verið høvuðsvenjari hjá ÍVB-kvinnum, venjari hjá næstbestu liðunum í fleiri feløgum og seinast hjálparvenjari hjá ÍF.

Lærarin og fyrrverandi skúlastjórin er tvíburðabeiggi Tummas Erling Djurhuus, sum stóran partin av 2023 stóð á odda fyri TB. Hann hevur A-venjaraprógv, og tískil kann hann standa á odda fyri TB.

Fyrsti dystur hjá Sonna sum høvuðsvenjara verður 30.mars við Stórá ímóti B36. Uppflytararnir úr TB hevur tvey stig fyri tveir dystir.

André Dalfoss, formaður, og Karl Øster (Mynd: Tvøroyar Bóltfelag)

Bárður Dimon, Karl Øster og Tórður Hentze halda fram. Karl Øster hevur staðið á odda, síðani Rasmus Nolsøe og síðani norsku venjararnir fóru úr felagnum.

Harvið er venjaratoymið fullmannað, og TB staðfestir, at "eitt sterkt lokalt venjaratoymi upp á pláss". Allir eru upprunaliga úr økinum, uttan Tórður, sum flutti til Tvøroyrar í fjør. Hann hevur áður verið venjari hjá ÍF Føroyar.

- Hetta gevur samstundis venjaratoyminum pláss til at styrkja, menna og arbeiða meira saman við okkara 2.deildarliði, skrivar TB.

Vinarliga broyt tínar kennifíla - og privatlívsstillingar fyri at síggja hetta innihald