Zlatan Ibrahimovic er nú best lønti leikarin í søguni hjá MLS

Í desember skrivaði svenska fótbóltsstjørnan, Zlatan Ibrahimovic, undir nýggjan eitt ára sáttmála við MLS-felagnum Los Angeles Galaxy.

Sostatt er hann nú best lønti leikarin í MLS kappingini.

Við nýggja sáttmálanum, er upphæddin á gamla sáttmálanum, sum hann skrivaði undir, tá hann skifti frá Manchester United til Los Angeles Galaxy í mars í fjør, fimmfaldað, skrivar TV2.

Svenski áleyparin kemur at forvinna 7,2 milliónir dollarar (46,93 milliónir krónur) sambært nýggja sáttmálanum.

Í fyrsta kappingarárinum fyri Los Angeles Galaxy skoraði 37 ára gamli Zlatan Ibrahimovic 22 mál, men liðið megnaði ikki at koma víðari til endaspælið.