- Eg hevði eitt gullheiðursmerki at verja her í Gibraltar

Sum 23 áragamal vann føroyingurin Búgvi Poulsen gullheiðursmerki. Umframt gull fann hann sær eisini vív á tí túrinum.

Nú 24 ár seinni og ein vektklassa tyngri vann hann aftur gull í Gibraltar.

- Eg hevði eitt fyrstapláss at forsvara, segði Búgvi Poulsen skemtandi eftir dystin.

Men tað er sagt, so fær dómarastandurin eisini toyggið. Føroyingarnir eru als ikki nøgdir við nógvar av dómaraavgerðunum, sum verða tiknar í judohøllini.

Hetta er tó ikki galdandi fyri føroyska dómaran, sum er við til kappingina í Gibraltar, Andreas Sumberg. Sigast skal at føroyingurin er eitt ættarlið yngri enn allir hinir dómararnir.

- Eg skilji ikki hví teir ikki brúka Andreas. Hann skilir reglarnar – tað gera hinir ikki, segði Búgvi Poulsen.

Føroyingarnir brúktu tó kritiseraða møguleikan fyri at mótmæla tá Búgvi vann. Hann hevði lagt seg frammanfyri við einum wasari tíðliga í dystinum, so hann skuldi bara hava tíðina at ganga og geva hinum initiativið. Og í eini roynd frá mótstøðumanninum av Menorca at gera eitt kast, yvirtók Búgvi hegnisliga kastið, so menorcamaðurin endaði á síðuni, og tað gevur vanliga eitt wasari.

Dómarin dømdi tað ikki, men føroyski venjarin mótmælti, og eftir tingingar við dómaraborðið, fekk hann eitt wasari afturat.

- Tað sigur eitt sindur um dómaran í finaluni, at hann setti dystin í gongd aftur uttan at vera greiður yvir, at eg hevði tvey wasari og harvið hevði vunnið dystin. Tað visti mótstøðumaður mín, og hann kom bara yvir og tók í hondina á mær.

Nicolai tapti bronsuna
Búgvi hevði vænta sær at skula berjast móti Nicolai Skoubo í finaluni, men so gjørdist ikki. Nicolai møtti einum sterkum guernseybúgva í síni bronsufinalu.

Talan er um ein sera sterkan íðkara, sum er bretskur meistari í 21 aldursbólkinum. Men Nicolai basti honum – kanska nakað óvæntað, serliga fyri guernsaybúgvan – í innleiðandi dystinum, so hann hevði nakað at hevna.

Nicolai hevði eisini eina harða semifinalu í kroppinum, so í bronsufinaluni var hann við undirlutan, so nú stendur 1-1 millum teir báðar.