- Ein torfør uppgáva

Í sambandi við landsdystin ímóti Spania í morgin, hevði føroyska landsliðið tíðindafund á middegi í B36 húsinum. Føroyska landsliðið hevði júst havt sína síðstu venjing áðrenn dystin, og tað er greitt, hvørjir byrja inni, hóast tað ikki verður kunngjørt áðrenn dystin sjálvan. 

Lars Olsen segði á tíðindafundinum, at allir spælarir eru tøkir til dystin, og at støðan í hópinum sum heild er góð. Men hann mátti eisini ásanna, at talan var um sera torføra mótstøðu. 

- Eg haldi talan vera um tað besta liðið í bólkinum, so tað verður ein torfør uppgáva. Men vit mugu bara gera okkara besta og halda góða andanum, segði Lars Olsen, sum ikki segði nakað um, hvørjum úrsliti føroyingar fóru eftir. 

- Eftir dystin eru vit kanska nøgdir og kanska ikki, segði ein fámæltur landsliðsvenjari. 

Liðskiparin hjá Føroyska landsliðnum hevði eisini orðið til tíðindafundin. Hann segði talan vera um eina stóra uppgávu. 

Atli Gregersen (Mynd: Sverri Egholm)

- Okkara spælarir hava fylgt sponsku spælarunum, síðani teir vóru smádreingir, segði Atli Gregersen, sum tó legði doyðin á, at andin í hópinum var góður, og at farið varð eftir einum so góðum úrsliti sum møguligt. 

Føroyar og Spania spæla í morgin klokkan 19.45 á Tórsvølli. Talan verður um nakrar broytingar á føroyska liðnum. Gunnar Nielsen er ikki við vegna skaða, og tí verður tað allarhelst Teitur Gestson, ið verjir føroyska málið í morgin. 

Sonni Ragnar Nattestad er heldur ikki við í morgin. Hann var heldur ikki við seinasta dyst ímóti Rumenia, men talan er annars um fæstan inventar á føroyska liðnum. Tað eru fleiri møguligir avloysarar í miðverjuni. Boð hava áður verið eftir Odamari Færø, og tí er ikki óhugsandi, at hann eisini byrjar í morgin.