07 Vestur er nú omanfyri niðurflytingarstrikuna

Tríggir av dagins Betrideildardystum eru av.

Í Sørvági byrjaði 07 Vestur sum eitt óløgi í afturvendanini hjá Micheal Schjønberg. Liðið, og Mikkel Hyllegaard hildu á, har man slepti móti TB: Tað var 2-0 eftir eitt korter, og Hyllegaard skoraði sítt seinna mál tíggju minuttir fyri steðgin, eftir at kviki danin fekk góða sending.

Sonni Ragnar Nattestad skoraði fyrsta málið í dystinum við góðum stútara. Í 2. hálvleiki skuldu hann og liðfelagararnir í stóran mun verja. B68, ið ikki heilt tyktiskt til staðar fyri steðgin, var omaná allan 2. hálvleik. Tað eydnaðist eisini at minka um munin til 3-1, tá Sebastin Lau Nielsen var snildur og skjótur, eftir 07 Vestur hevði mist bóltin í uppspælinum.

Tað gjørdist tó ikki tættari enn hetta á máltalvuni. Eitt bakkast hjá B68, sum vann á B36 í seinasta umfari men sum helst hevur nýtt nógva megi í steypahálvfinaluni mikukvøldið. 07 Vestur var fyri steðgin ágangandi og vælskipað og hevur nú átta mál og fult stigatal tveir teir seinastu dystirnar. Hetta merkir eisini, at liðið er á 8. plássi og fyri fyrstu ferð síðani í ár omanfyri niðurflytingarstrikuni.

Sonni Ragnar Nattestad og hinir hjá 07 Vestur omaná (Mynd: jn.fo/Jóanis Albert Nielsen)

Í hinum báðum dystunum vunnu stórfavorittarnir greitt á uppflytarunum. Munurin var minni í Sarpugerði, men har kom málið hjá FC Suðuroy til 3-1 ikki fyrrenn í 90. minutti. Poul Kallsberg er byrjaður at gerast heitur, og í dag gjørdi strandingurin hattrikk.

Hattrikk kom eisini við Stóra, har oddaliðið vann greitt á botnliðnum. TB hevði ein stóran møguleika og nakrar støður í undanvindinum fyri steðgin, men KÍ hevði sanniliga sínar møguleikar, og talan gjørdist eisini um fimm mál: Árni Frederiksberg gjørdi trý teirra - eitt við beinleðis hornasparki. Hini bæði skoraði Dávid Biskopstø Andreasen. Klaksvíkingurin fær størri og størri álit frá Magnusi Powell.

KÍ hevur júst nú fýra stig niður til NSÍ, sum í løtuni spælir móti HB við Løkin. Hetta er seinasti dysturin í umfarinum

Betrideildin 11. umfar
Í dag, sunnudagin 25. mai
TB - KÍ 0-5 (0-2)
15' Árni Frederiksberg (Jonn Johannessen) 0-1
36' Dávid Biskopstø Andreasen (Jóannes Kalsø Danielsen) 0-2 
64' Dávid Biskopstø Andreasen (Jóannes Kalsø Danielsen) 0-3
78' Árni Frederiksberg 0-4
89' Árni Frederiksberg 0-5

Meira um dystin her

Víkingur - FC Suðuroy 3-1 (1-0)
31' Poul Kallsberg (Sølvi Vatnhamar) 1-0
48' Poul Kallsberg (Jákup Johansen) 2-0
63' Poul Kallsberg (Stefan Radosavljevic) 3-0
90' Teit Hjelm (Salmundur Bech) 3-1

Meira um dystin her

07 Vestur - B68 3-1 (3-0)
13' Sonni Ragnar Nattestad (Mikkel Elbæk Jacobsen) 1-0
16' Mikkel Hyllegaard (Silas Gaard) 2-0
36' Mikkel Hyllegaard (Filip Drinic) 3-0
69' Sebastian Lau Nielsen 3-1 

Meira um dystin her

17.15: NSÍ - HB (0-1)

Í gjár, leygardagin 24. mai
B36 - EB/Streymur 0-0

Reytt kort: Hannes Agnarsson (30')

Sí eisini: Boubacar Dabo brendi tvey brotsspørk móti EB/Streymi