Andri Benjaminsen aftur til NSÍ

Eftir trý ár í B68, skiftir Andri Benjaminsen til NSÍ. Eitt felag, sum 24 ára gamli miðvallaleikarin fleiri ferð áður hevur umboðað.

NSÍ spælir næsta kappingarár í næstbestu deildini, og skal royna at vinna seg uppaftur í Betri deildina og til sunnudagsfótbólt.

- Hóast tað er NSÍ, sum burdi givið Andri eina føðingardagsgávu, so er tað øvut hesaferð. Á sínum 24-ára føðingardegi í dag gevur hann okkum gulu eina stóra gávu, tí hann hevur júst skrivað undir ein 2-ára sáttmála við NSÍ, skrivar felagið.

Andri hevur spælt 68 dystir í bestu deildini og 104 dystir í næstbestu deildini. Í hesum báðum deildunum hevur hann skotið heili 59 mál.