Andrias og Noah fyri fyrstu ferð - seks broytingar á liðnum

Á tíðindafundinum í gjár segði Håkan Ericson, at tríggjar til fýra broytingar fóru at verða gjørdar í føroysku byrjanaruppstillingini, í mun til hana í Kekkia mikukvøldið. Tá taptu Føroyar 5-0. 

Nú er greitt, at talan er um heilar seks broytingar, og at tað í fyrstu syftu er upp til hesar ellivu, at Føroyar avrika betur hesuferð: 

Føroyar (4-4-2): Mattias Heðinsson Lamhauge – Gilli Rólantsson Sørensen, Andrias Edmundsson, Gunnar Vatnhamar, Viljormur Davidsen – Sølvi Vatnhamar, Noah Mnenéy, René Shaki Joensen, Meinhard Egilsson Olsen – Pætur Joensson Petersen, Patrik Johannesen.

Teir ið verða avloystir eru Gunnar Nielsen, ið ikki er við í Kosovo, Hanus Sørensen, Sonni Ragnar Nattestad, Heðin Hansson, Mads Boe Mikkelsen og Klæmint Andrasson Olsen.

Hetta er fyrstu ferð, at 21-ára gamli miðverjin Andrias Edmundsson og 19-ára gamli miðvallarin Noah Mneney spæla á føroyska A-landsliðnum. Pætur Petersen kom inn fyri fyrstu ferð í Kekkia - nú byrjar 24-ára skálvíkingurin fyri fyrstu ferð. Mattias Lamhauge hevur einaferð áður vart málið. Hetta var í venjingardystinum móti Liktenstein í mars.

Mattias Lamhauge úr B36 byrjar inni - Bárður á Reynatrøð, ið her er hálvgum sitandi, spælir møguliga í seinna hálvleiki (Mynd: Sverri Egholm)

Talan verður um A-landsdyst nummar 60 hjá 30-ára gamla Gilla Rólantssyni Samuelsen og nummar 25 hjá 24-ára gamla Meinhardi Egilssyni Olsen.

Á bonkinum sita Bárður á Reynatrøð, Hans Jørgensen, Mads Boe Mikkelsen, Sonni Ragnar Nattestad, Klæmint Olsen, Heðin Hansen, Hanus Sørensen, Samuel Chukwudi, Jann Benjaminsen, Andrass Johansen, Martin Agnarsson, Kaj Leo í Bartalsstovu og Stefan Radosavljevic.

Fyrsta bríksl í Kosovo í kvøld er klokkan 17. FM1 hevur beinleiðis frásøgn frá dystinum, sum eisini kann síggjast hjá Kringvarp Føroya. Portalurin hevur beinleiðis dagfrøing úr Pristina, og aftaná verður samanumtøka av ymsum slag.