Annað

Badminton: Góð føroysk úrslit í Reykjavík

Yvir 15 føroysk heiðursmerki gjørdist tað til í RIG, har føroyingarnir serliga gjørdu um seg í U19.

Sissal Thomsen(HBF) vann gull í U19, og varð kosin til besta kvinnuliga leikaran í Reykjavík hetta vikuskifti

2019-02-04 15:15

Agnar Prestá

Hetta vikuskifti hava Reykjavík International Games verið á skránni. Eins og undanfarin ár, hava nógvir føroyskir badmintonleikarar luttikið. Leikarar frá MBF, KBF og HBF hava spælt í deildunum U11, U13, U15, U17 og U19.

Føroysku leikararnir fingu góð úrslit - her er eitt yvirlit yvir heiðursmerkini:

U11: Føroysk luttøka - har øll spældu seg til eina væluppiborna gullmedalju.

U13: Í A-bólkinum: 1 gull og 1 silvur
Í "consolation": 1 gull

U15 Í A-bólkinum: 3 silvur
Consolation: 3 gull og 1 silvur

U17: Í A-bólkinum: 1 gull
Consolation: 1 gull

U19: A-bólkurin: 2 gull og 3 silvur

Tað var serliga i U19, at føroysku leikararnir stóðu seg væl. Hetta er annars ein bólkur, sum íslendsku leikararnir hava sitið á seinastu árini.

Sissal Thomsen vann gull í single í júst U19, og tá kappingin endaði, varð hon kosin til besta kvinnuliga leikara í RIG.

Á Facebook-síðu sínair skrivar Badmintonsambandið, at tað er gleðiligt fyri føroyskt badminton, at føroysku feløgini aftur sendu nógvar leikarar til Reykjavík International Games. BSF skrvar, at kappingin gevur nógv fyri teir mongu leikararnar, tí her møta teir avbjóðingum frá leikarum, ið teir ikki vanliga spæla ímóti. Samstundis er kappingin við at styrkja um samstarvið ímillum feløgini.

Myndir av føroysku heiðursmerkjavinnarunum kunnu síggjast á Facebook-síðuni: Badmintonsamband Føroya

Vinarliga broyt tínar kennifíla - og privatlívsstillingar fyri at síggja hetta innihald