Brian skiftir til B68

B68 fær ikki nógvar nýggjar spælarar inn til nýggja kappingarárið, og missir millum annað Mohammed Samba (HB), Boubacar Dabo og Sebastian Lau Nielsen. Hesir útlendsku spælarar hava í ymsum tíðarskeiðum seinastu tvey árini havt stóran týdning fyri álopskenda spælið hjá B68.

Sum bolt.fo skrivaði seinnapartin í gjár, so hevur B68 tó vunnið kappingina um undirskriftina hjá Briani Jakobsen. 

32-ára gamli strandingurin skoraði 11 mál fyri AB í ár - harav níggju eftir summarsteðgin - og var í uppskoti sum ársins áleypara.

Brian Jakobsen kom av álvara í gongd í summar (Mynd: Sverri Egholm)

Nú AB flutti niður, vildu sum verða man fleiri hava fatur á Briani, og tað eydnaðist Jákupi á Borg og B68. Brian Jakobsen hevur áður spælt fyri sama høvuðsvenjara - tað var í B36 í 2019 og 2020.

Umframt B36 og AB hevur Brian spælt fyri barndómsfelagið Skála í Betrideildini. Sterki áleyparin hevur, sambært FaroeSoccer, samanlagt 176 dystir í bestu deildini. Har hevur hann skorað 56 mál. Hagtølini í 1. deild og í steypakappingini eru eisini góð.