Elias toppskjútti og mest virðsmikli leikari í kappingini

Frammanfyri næstan 6.000 áskoðarum fylgdust Føroyar og Svøríki tríggjar fjórðingar av dystinum. Men seinasta korterið gjørdu føroyingarnir av álvara bart, og spældu uppaftur meira sannførandi enn undanfarnu 45 minuttirnar og í flottu sigrunum undanfarnu dagarnar. Føroyingarnir vóru ísakaldur í avgerandi støðuni og vístu aftur sínar nógvu dygdir.

(Pauli Jacobsen hevur verið ógvuliga stinnur sum aftasti skansi í kappingini - Mynd: Harald Bjørgvin)

Talan var um eitt ógvuliga flott liðavrik, men áðrenn allir leikararnir og teir í venjaratoyminum fingu gullheiðursmerki, vórðu perónligir heiðrar givnir. Pauli Jacobsen hevur staðið eina frálíka kapping, og í finaluni hevði føroyski málverjin 15 bjargingar. Hann vann eisini væl uppiborið heiðurin sum besti málverji. Hákun West av Teigum kom eisini á All Star-liðnum. Hann hevur skorað nógv góð mál av høgra vonginum, og hann skoraði í 2. hálvleiki í dag fýra týdningarmikil mál. Tveir sviar, tveir ungarar og ein hvítarussi vóru eisini á All Star-liðnum, og ein íslendingur fekk heiðurin sum besti verjuleikari.


(Hákun West av Teigum varð kosin besti høgri vongur - Mynd: Harald Bjørgvin)

Pauli og Hákun eru liðfelagar í Skanderborg, og triðji føroyski leikarin úr felagnum var toppskjútti í European Open við heili 70 málum. Elias Ellefsen á Skipagøtu hevur verið heilt framúr hesa kappingina, og tann mest umráðandi leikarin á sterka føroyska liðunum - gullvinnarunum. Í dag tók Elias aftur ábyrgd við 11 málum, og einasta orsøkin til at hann ikki var á All Star-liðnum var, at hann kosin MVP: Mest virðismikli leikari i kappingini. Tað er helst eingin ivi um, at hetta er so fult uppiborið. Vit eiga harvið besta leikaran og besta liðið.