Agnar Prestá
Elias Ellefsen á Skipagøtu vil enda sína tíð í Sävehof við manér. Hetta tykist í øllum førum greitt eftir seinastu avrikunum at døma.
Hoyvíkingurin var kosin besti spælari í Svøríki fyri apríl, hevur verið tann mest árinamikil (effektivi) av øllum í SM-endaspælinum, og nú eftir EM-undankappingarsteðgin legði hann út sum eitt óløgi.
IK Sävehof tók í kvøld ímóti Ystads IF í Partille. Hetta var fyrsta hálvfinalan, og 20-ára gamli føroyingurin gjørdi bart við heili 12 málum og 8 uppleggum. Hann varð greiður toppskjútti í fimm-málssigrinum, og Sävehof skýrdi avrikið “gandakent” á sínum sosialu miðlum, eins og nógv rós kom uttanfrá.
Elias fer til THW Kiel í summar, men roynir at fáa enn eitt svenskt meistaraheitið í hús. Tveir sigrar skulu til til aftrurat - hálvfinala nummar tvey í røðini verður í Ystads mánakvøldið 8. mai.
17-ára gamli liðfelagin og systkinabarnið, Óli Mittún, skoraði eitt mál í kvøld. Sävehof vann 31-26. Í steðginum var tað +2 til føroyingaliðið.
Vinarliga broyt tínar kennifíla - og privatlívsstillingar fyri at síggja hetta innihald