FCK vann seg víðari við sigri í Parkini

Helmingurin av teimum 32 liðunum í Champions League bólkaspælinum hava nú spælt sínar seinastu dystir har. Her er eitt yvirlit yvir úrslitini í kvøld, hvør er víðari, og hvørji lið skulu yvir í Europa League

Bólkur A, 6. umfar og endastøða:

Manchester United - Bayern München 0-1 (0-1) 
FCK - Galatasaray 1-0 (0-0)

1. Bayern München 16 stig *
2. FCK 8 stig *

3. Galatasaray 5 stig **
4. Manchester United 4 stig

* Víðari
** Europa League

Tann mest spennandi bólkurin undan umfarinum, tí trý lið dystaust um at koma víðari saman við Bayern.

FCK lá best fyri og gjørdi eisini arbeiði liðugt í Parkini, har tað kókaði. Ein sterkur liðinnsatsur frá leyvunum og í 58. minutti setti Lukas Lerager fótin á eitt ógvuliga væl spælt álop. Sjey stig seinastu tríggjar dystirnar og uppiborið 2. pláss hjá Jacob Neestrup og hansara monnum. Hetta er aðru ferð í søguni, at eitt danskt felag spælir seg víðari úr bólkaspælinum í Champions League. Fyrru ferð var í 2010/2011 - tað var eisini FCK.

Galatasaray var ikki langt frá at javna móti endanum av dystinum í Parkini. Um tað hevði endað við javnleiki har, so hevði tað United spælt seg víðari við sigri á Bayern, sum ikki spardi nakað. Tað var tó ongantíð heilt nær við, at enska felagið gjørdi sítt. Heimaliðið skapti lítið og einki á Old Trafford, og liðið hjá ten Hag lat einasta málið í dystinum inn.

Fjórðu ferð uppá tólv ár, at United ikki kemur víðari í bólkaspælinum í Champions League. Aftasta pláss og fleiri trupulleikar á Old Trafford.

Tuchel fer sannførandi víðari - spurningurin er, hvørjari støðu Erik ten Hag er í (Mynd: EPA)

Lukas Lerager hevur skorað fyri FCK og alt á gosi. Danska høvuðsstaðarfelagið verður í pottinum til áttandapartsfinalurnar, og nógvar milliónir afturat koma í kassarn (Mynd: EPA) 

Bólkur B, 6. umfar og endastøða:

Lens - Sevilla 2-1 (0-0)
PSV - Arsenal 1-1 (0-1)

1. Arsenal 13 stig *
2. PSV 9 stig *

3. Lens 8 stig **
4. Sevilla 2 stig

* Víðari
** Europa League

Her var alt so at siga avgjørt áðrenn, men Arsenal staðfesti 1. plássið við javnleiki og nógvum eykamonnum í Eindhoven.

Stóra søgan var, at sjeyfaldu Europa League-vinnararnir úr Sevilla ikki fingu 3. plássi og harvið ikki sleppa at spæla í Europa League eftir nýggjár.

Bólkur C, 6. umfar og endastøða:

Napoli - Braga 2-0 (2-0)
Union Berlin - Real Madrid 2-3 (1-0)

1. Real Madrid 18 stig *
2. Napoli 10 stig *

3. Braga 4 stig **
4. Union Berlin 2 stig

* Víðari
** Europa League

Fult stigatal til Real Madrid og sum væntað gjørdi Napoli sítt á heimavølli og tryggjaði sær 2. plássið.


Bólkur D, 6. umfar og endastøða: 

Inter Milan - Real Sociedad 0-0
RB Salzburg - Benfica 1-3 (0-2)

1. Real Sociedad 12 stig *
2. Inter Milan 12 stig *

3. Benfica 4 stig **
4. RB Salzburg 4 stig

* Víðari
** Europa League

Real Sociedad tryggjaði sær fyrsta plássið við málleysa javnleikinum í Milano. Benfica vann seg upp á 3. plássið.

16 dystir - teir seinastu í bólkaspælinum - eru á skránni í morgin