Filip heldur fram í EB/Streymi

Seinastu tvey árini hevur Filip Djordjevic spælt 53 dystir fyri EB/Streym. Í 2022 endaði felagið á 5. plássi - hægsta endaplássið hjá EB/Streymi í Betrideildini síðani 2014 -  og Filip varð valdur til ársins spælara í felagnum. Í fjør var álopskendi spælarin nakað darvaður av skaða í fyrru hálvu, men var týðandi í tíðarskeiðnum eftir summarsteðgin, tá EB/Streymur meira ella minni tryggjaði sær plássi í deildini.

Nakað av óvissu hevur verið um, hvar Filip fer at spæla í 2024, og har var íhvussu er tilboð úr onkrum øðrum føroyskum felagi.

Nú er tó greitt, at nýggjur sáttmáli er gjørdur millum Filip Djordjevic og EB/Streym. 

- Við Filipi hava vit fingið ein sera royndan offensivan leikara við sera góðum dygdum (...) Vit eru sera glað fyri, at Filip Djordjevic hevur valt at halda fram í felagnum. Filip hevur skrivað undir ein eitt ára sáttmála og verður hetta nú hansara triðja kappingarár í EB/Streymi

Soleiðis skrivar felagið á Facebook-síðu sínari í kvøld. Við hesum hevur EB/Streymur tryggjað sær eina týðandi undirskrift til næsta kappingarár.

Les eisini: Arnbjørn og Niels Paul -skulu hjálpa Sigfríði í EB/Streymi

Serbin, ið fyllur 30 ár beint undan kappingarbyrjan, hevur verið í Føroyum síðani 2010. Hann hevur spælt beint yvir 300 dystir í Betrideildini, sum Filip hevur verið við til at vunnið tvær ferðir við Víkingi. Hann vann eisini Løgmanssteypið fýra ferðir, á rað, við sama felagið, og samanlagt hevur Filip Djordjevic yvir 50 mál á hægsta stigi í Føroyum.

Tøla: FaroeSoccer