Final Four: Aalborg vann seg í finaluna við sigri á PSG

Um eitt ár skiftir Mikkel Hansen tað veruliga París út við "Nordens Paris", ið Aalborg onkutíð verður nevnt. Aalborg Håndbold er framsøkið og vil staðfesta seg sum besta lið í Danmark og kappast millum tey bestu í Evropa. Í hesum skal maðurin við 24-talinum á rygginum og hárbandinum vera ein lykil, men í gjár sló Aalborg fast, at liðið longu nú kann gera seg galdandi - og tað gekk útyvir Mikkel Hansen, ið framvegis ikki hevur roynt at vunnið Champions League.

Mikkel og hinir hjá PSG høvdu meira at fegnast um fyrstu smáu 40 minuttirnar, men so vendist dysturin (Mynd: EPA)

Í áttandapartsfinalunum vann Aalborg seg víðari móti Porto orsakað av fleri málum á útivølli, og í fjórðingsfinaluni vann norðurjútska liðið púra óvæntað á øðrum av týsku risunum, Flensburg-Handewitt. Harvið møtti liðið hjá Stefan Madsen upp í Köln til Final Four hetta vikuskifti. Tað varð væntað, at risin ur París fór at koppa dønunum og sviiunum á liðnum úr Aalborg uttan stórvegis himpr í hálvfinaluni, og PSG var eisini omaná í fyrra hálvleiki, og tíggju minuttir inn í 2. hálvleik varð munurin fimm mál fyri fyrstu ferð í dystinum.

Men so kom undi Simon Gade í gongd í málinum, sviin Felix Claar gav PSG-verju og málverja høvuðbrýggj, og teir í hvítum reisti seg sum eitt lið. Mitt í 2. hálvleiki var munurin minkaður niður í eitt mál, og so leikaði heilt javnt á. Toppskjúttin Claar skoraði til 30-29, tá fimm minuttir vóru eftir, Aalborg slepti ongantíð leiðsluni aftur, og so var ein øðilig gleði í donsku leguni, meðan vónbrotið hjá Mikkel Hansen og co, ið eisini taptu hálvfinaluna í størstu evropeisku kappingini í fjør, var stórt.

Tað eydnaðist ikki hjá PSG at halda Felix Claar í seinna hálvleiki. Sviin gjørdist toppskjútti í dystinum við átta málum 

Stefan Madsen hevði sanniliga nógv at fegnast um í gjár (Mynd: EPA)

Tað er fyrstu ferð í 45 ár, at eitt danskt felag er í Champions League-finaluni, og hetta verður mett sum eitt av størstu avrikunum nakrantíð. Í 1976 tapti Fredericia KFUM finaluna, og tað er eisini sannlíkt, at Aalborg tapir fyri Barcelona í Kiel í kvøld. Katalanska liðið er stórfavorittur. Í gjár vann Barcelona á Nantes í hinari hálvfinaluni eftir at hava verið á odda í næstan 60 samfullar minuttir. Í fjør tapti Barcelona finaluna fyri Kiel, men nú skal 40-ára gamli Raul Enterrios royna at fáa eitt seinasta gull við felagi sínum í hús, og har er ein rúgva av øðrum navnframum spælarum á Barcelona-liðnum.

Kelda: TV2.dk

Champions League Final Four
Lanxess Arena, Köln  - Í gjár, leygardagin 12. juni
Hálvfinalur

PSG - Aalborg Håndbold 33-35 (15-13)
Barcelona - Nantes 31-26 (15-13)

Í dag - sunnudagin 13. juni
Dystur um 3. plássið
(14.15): Nantes - PSG

Finala
(17.00): Barcelona - Aalborg Håndbold

Dystirnir kunnu síggjast á Viaplay