FM-fjórðingsfinalurnar á skránni um vikuskiftið

Sunnudagin komu grundspælini hjá monnum og kvinnum at enda, og áðrenn næsta vikuskiftið er av verður greitt, hvørji lið koma víðari í fjórðingsfinalunum - og hjá hvørjum liðum kappingarárið sum so kemur at enda.

Sambært heimasiðuni hjá Hondbóltssambandinum verður fyrsta fjórðingsfinalan fríggjakvøldið klokkan 19. Hetta í Hoyvík har Neistin vitjar. Annars skuldu báðir dystirnir hjá monnum verða spældir sunnudagin, so somu treytir vera undan hálvfinalunum. Men H71 ynskti at framskunda til fríggjakvøldið - sum skilst vegna konfirmatiónir í Hoyvík sunnudagin. Neistin var ímóti hesum, men HSF gekk hesum á møti.

Í báðum 1/4-finaluni í Burn-deildini hittast somu lið, sum í seinasta umfarið í grundspælinum. KÍF vitjar aftur á Skála sunnudagin - StÍF og H71 standa sum favorittar í uppgerðunum.

Hjá kvinnum eru uppaftur greiðari favorittar; serliga VÍF móti Stjørnuni. Vestmannakvinnur vóru nær við at vinna sær 2. plássið og harvið beinleiðis pláss í hálvfinaluni. Neistin er uttan skøddu Bjørk F. Joensen móti StÍF, sum hevur havt nógv sveiggj í ár. Báðar fjórðingsfinalurnar hjá kvinnum verða spældar leygardagin.

Rannvá Olsen er í vikuni úttikin til avgerandi HM-undandystirnar móti Litava sum avloysari hjá Turið Arge Samuelsen. Hon og VÍF taptu í 2023 móti Stjørnuni í fjórðingsfinaluni - nú skulu tær í Vestmanna royna at vinna seg í eina FM-hálvfinalu aftur (Savnsmynd: Sverri Egholm)

Tað er sum so ógvuliga einfalt: Tað er ein einstakur dystur, og vinnarin fer víðari til hálvfinalurøð. Taparin er úti av FM-stríðnum. Liðið, sum endaði frammanfyri í grundspælinum, hevur heimavøll og harvið ein fyrimun.

FM-fjórðingsfinalurnar í SMS-deildini
Leygardagin 5. apríl
18.00: VÍF - Stjørnan  
19.00: Neistin - StÍF

H71 og Kyndil eru beinleiðis víðari til hálvfinalurnar

FM-fjórðingsfinalurnar í Burn-deildini
Fríggjadagin 4. apríl
19.00: H71 - Neistin

Sunnudagin 6. apríl
16.00: StÍF - KÍF

Kyndil og VÍF eru beinleiðis víðari til hálvfinalurnar

Til ber at fylgja gongdini í øllum dystunum ovast á forsíðuni á Portalinum og roysni.fo. Dystirnir kunnu stroymast á live.hsf.fo.