U18 EM: Føroyar stríddu seg til javnleik og spældu seg víðari

Eysturríki skuldi vinna við sjey málum fyri at yvirhála Føroyar og spæla seg víðari saman við Spania.

Hesar fyritreytirnar kendu bæði liðini, tá farið var á vøllin í Beograd í kvøld. Men hóast Eysturríki var á odda nakað yvir helmingin av dystinum, kom føroyska plássið í ovara miðumfarinum ikki veruliga í vanda.

Tá munurin var størstur var hann trý mál. Men týðandi verjuatgerðir, bjargingar frá Micah Wardum Ragnarsson ella góð mál i í teimum trýstu støðunum hjá Føroyum syrgdu fyri, at tað ikki "gjørdist ov spennandi" fyri ungu føroysku menninir.

Micah Ragnarsson týðandi leiklut í janvleikinum (Mynd: Dusan Sandic)

'Álopsspælið var annars í løtum merkt av mistøkum og serliga brendum skotum - frá millum annað stóra profilinum Boasi Ellefsen á Skipagøtu. Sergej Novakovic, sum fyri 15 døgum síðani spældi væl í U20 EM-uppgerðini millum londini, hevði heili 16 bjargingar. Novakovic hevði tíðliga stórbjargingar, men vegna góðar bjargingar hjá Micha hinumegin og árøði í føroysku verjuni, fylgdust liðini so at siga allan 1. hállveik.

Hugin Halgirsson og Teitur Bogason gjørdu bart í miðverjuni. Síðstnevndi varð eisini javnsettur toppskjútti við fimm málum av strikuni, og stríðsinnsatsurin hjá Teituri tryggjaði honum heiðurin sum dagsins spælari.

Føroyska verjan hevði sum heild ein góðan dag. Teitur Bogason (nummar 80) gjørdi stóran mun í báðum endum av vøllinum (Myndir: Dusan Sandic)

Axel Holm Simonsen og Gabriel Skeel Árnason vóru eisini millum teir, ið tóku síni tøk. Liðformaðurin Gabriel trekti tveir álopsfeilir í løtuni í 2. hálvleiki, har Eysturríki veruliga hótti við at fara avstað.

Tað sluppu eysturríkar ikki, og góður føroyskur endi syrgdi fyri einum stigi. 26-26 og í fyrsta endaspælinum hjá hesum árgangunum hava teir vunnið seg víðari. Tað er flott, og nú nærkast málið um at enda í topp-15 og vinna seg til U19 HM næsta ár .

Dystirnir í miðumfarinum, har Føroyar einki stig hevur við, eru mánadagin og týsdagin (3. og 4. august). Teir eru ímóti Póllandi og krútsterku dønunum.

U18 EM-endaspæl, bólkur F
3. og seinasta umfar - í dag, leygardagin 1. august
Føroyar - Eysturríki 26-26 (12-13)

Toppskjúttar: Boas Ellefsen á Skipagøtu og Teitur Bogason, 5 mál
Sí hagtøl her

Dagsins spælari: Teitur Bogason

Dysturin sæst í fullari longd her

Endastøðan í bólkinum: 
1. Spania 6 stig 
2. Føroyar 3 stig
--------------------
3. Finnland 2 stig *
4. Eysturríki 1 stig *

Tvey lið ovastu liðini eru víðari til ovara miðumfari. Har eru Danmark og Pólland á skránni hjá Spania og Føroyum

Verður dagført