Føroyingafeløg sluppu undan niðurflyting - fleiri í góðari støðu undan endaspælinum

Tað varð dramatiskt, tá seinasta umfar í Kvindeligaen varð spælt seint seinnapartin. Allir dystirnir vórðu, sum vera man, spældir samstunds. 

Tvey av føroyingafeløgunum vórðu íblandaði í tætta dystinum um at sleppa undan aftasta plássinum. Um man endaði niðri á 14. plássi eftir dagsins dystir, so var niðurflytingin veruleiki.

Hetta varð veruleikin fyri Århus Håndbold og ikki Aalborg (Annika Fríðheim Petersen og Lív Sveinbjørnsdóttir Poulsen) og Skanderborg (Súnu Krossteig Hansen). Skanderborg og Aalborg skuldu vinna - og gjørdu tað eisini.

Skanderborg vann stórt í Bjerringbro, tá mest stóð á, EH Aalborg vann 32-30 á Sønderjyske, og Århus tapti fyri Odense, sum vann allar dystirnar í grundspælinum. Øll trý botnliðini endaði jøvn í stigum, men Århus var verri innanhýsis. 

Sí stigatalvu her

Fagnaðarmynd hjá Skanderborg - Súna K. Hansen sæst aftast (Mynd: Skanderborg Håndbold)

Eingin føroyingur var tó á vøllinum fyri Skanderberg ella Aalborg í væleydnaðu bjargingarroyndini. Annika Fríðheim Petersen er við barn, og Lív Sveinbjørnsdóttir Poulsen hevur ikki spælt fyri Aalborg seinastu tíðina. Súna Krossteig Hansen hevur verið nógv skaðadarvað hetta kappingarárið og varð ikki mett at vera heilt til reiðar at koma aftur til lagnudystin. Kviki bakkurin kann tó møguliga spæla ein leiklut fyri Føroyar móti Litava mikukvøldið og/ella næsta sunnudag aftur.

Annika og Súna hava sáttmálar fyir næsta kappingarár við somu feløgum, sum nú ikki kunnu flyta beinleiðis niður. Tó verður eitt niðurflytingarspæl, har aftastu liðini eftir tað skulu spæla play-off dyst móti nummar tvey og trý í næstbestu donsku deildini.

Súna Krossteig Hansen hevur ikki spælt nógv fyri Skanderborg seinastu mánaðirnar vegna skaðar (Mynd: Skanderborg)

Pernille vann á Rakul - København fekk fyrimunin frammanfyri Viborg

Mikukvøldið gjørdist greitt, at Horsens skal spæla í ovara endaspælinum. Harvið sleppur liðið hjá Mariu Pálsdóttir Nólsoy undan at hugsa um alt, sum eitur niðurflyting, restina av árinum. Harvið hevði Horsens einki at spæla í Viborg í dag. Tað hevði heimaliðið tó. Eitt 5. pláss og møguliga eitt 4. pláss kundu røkkast við sigri, og um úrslitini aðrastaðni koppaðu rætt fyri Janu Mittún og tær.

Tað fyrra eydnaðist. Jana skoraði næstflest mál fyri Viborg (6 mál uppá 8 skot) og legði upp til fýra onnur í 33-28 sigrinum. Nakrar tekniskar villur vóru, men aftur ein góður dystur hjá Janu. Hetta var tó ikki nóg mikið til betri støðu áðrenn endaspælið, tí NFH og København vunnu.

Høvuðsstaðarfelagið hevði vitjan av Ringkøbing og vann greitt. Pernille Brandenborg var eisini í hopla fyri København: Hon skoraði átta av níggju skotum (næstflest), legði upp til tvey mál og so stóð føroyski landsliðsliðskiparin eisni væl í miðverjuni. Pernille varð vald til dagsins spælara í dystinum.

Rakul Wardum kom inn eftir tjúgu minuttir og stóð restina av dystinum fyri Ringkøbing. Landsliðsmálverjin hevði ringar fyritreytir, tí verjan megnaði sjálvdan at standa ímóti serliga sterka strikuspælinum, og nógv fór í netið. Rakul hevði tó níggju bjargingar (beint undir ein triðing av skotunum, sum komu á mál) og millum annað tvey brotskøst.

Hóast tapið, endar Ringkøbing nummar níggju og fær tvey stig við sær í niðara endaspælið. Hetta kann fáa stóran týdning. København og Pernille Brandenborg fingu ikki stig við sær, tí NFH vann sín dyst, men at enda nummar fimm heldur enn nummar ger, at møguleikarnir í ovara endaspælinum - at koma í hálvfinaluna - eru væl størri. København endar í sama bólki sum millum annað Horsens

Sí øll úrslini her

Sí endastøðuna í grundspælinum í Kvindeligaen HER.

Ovara endaspælið - byrjar 17. apríl

Bólkur 1:
Odense Håndbold 2 stig
NHF 1 stig
København Håndbold (Pernille Brandenborg)
Horsens (Maria Pálsdóttir Nólsoy)

Bólkur 2: 
Team Esbjerg 2 stig
Ikast Håndbold 1 stig
Viborg (Jana Mittún)
Sønderjyske

Eftir trý umfør fara tvey tey fremstu liðini í hvørjum bólki í DM-hálvfinalurnar.

Niðara endaspælið - byrjar 17. apríl
Ringkøbing 2 stig (Rakul Wardum)
Silkeborg-Voel 1 stig
Bjerringro FH
EH Aalborg (Annika Fríðheim Petersen og Lív Sveinbjørnsdóttir Poulsen) Skanderborg (Súnu Krossteig Hansen)

Tey liðini, sum enda niðast eftir fýra umfør, skulu spæla móti liðum úr næstbestu donsku deildini fyri at sleppa undan niðurflyting

Í morgin ferðast føroysku landsliðsspælararnir til Føroya, har landsdystur er á skránni móti Litava mikukvøldið. Fyrsti kvinnulandsdysturin við Tjarnir fær stóran týdning fyri, hvørt Føroyar koma til HM í vetur ella ikki.