Agnar Prestá
Tað er møguligt, at Gutti Dahl-Olsen hevur spælt sín seinasta dyst fyri EB/Streym fyribils. 21-ára gamli álopskendi spælarin úr Streymnesi hevur verið fastur maður hjá barndómsfelagnum seinastu árini - oftast sum fremsti maður ella sum vongur.
Gutti hevur ikki sáttmála fyri 2024, og í løtuni venur hann við liði uttan fyri landoddarnar.
Levanger skal næsta kappingarár spæla í næstbestu norsku deildini eftir uppflyting, og hevur givið Gutta Dahl-Olsen møguleika at venja við hesa vikuna. Hetta hevur Portalurin fingið váttað.
Spurningurin er so, um okkurt ítøkiligt spyrst burturúr. Sum skilst hevur áhugi eisini verið fyri honum í føroyskum feløgunum.
Gutti Dahl-Olsen hevur veruliga gjørt vart við seg á U21-landsliðnum í ár. Í báðum heimadystunum hjá Føroyum er hann komin inn og hevur skorað: Fyrst javnaði Gutti til 2-2 móti Andorra í juni, og tá Kroatia vitjaði í Klaksvík í september sló tekniskt gávaði spælarin til tvær ferðir. Hann hevur spælt 47 minuttir samanlagt í trimum dystum, og hevur harvið víst skerpni og hegni í brotsteignum.
Royndarvenjingin í Levanger endar fríggjadagin. Kaj Leo í Bartalsstovu spældi í felagnum í 2014 og 2015.
Vinarliga broyt tínar kennifíla - og privatlívsstillingar fyri at síggja hetta innihald