H71 og Neistin leggja seg fremst í steypakappingini

Steypakappingin hjá kvinnum varð skotin í gongd í gjárkvøldið, tá tveir dystir vóru í bólki 1. Í dag vóru tveir dystir í bólki 2.

Í Hoyvík, har VB var á vitjan hjá H71, var ongantíð tann heilt stóri spenningurin, og hoyvíkskvinnur kundu seta nógvar ungar kvinnur inn uttan, at tað ávirkaði úrslitið stórvegis. H71 vann dystin 34-26 við einari hálvleiksstøðu upp á 19-10.

Sí myndir frá H71-VB her

Toppskjútti hjá H71 gjørdist Maria H. Weyhe við sjey málum. Durita Hjelm var toppskjútti hjá VB somuleiðis við sjey málum.

Maria H. Weyhe gjørdist toppskjútti hjá H71 við sjey málum (Mynd: Sverri Egholm)

Á Hálsi í Havn var meira spenningur. Stjørnan úr Klaksvík var á vitjan hjá Neistanum, og komu væl frá byrjan. Meðan Neistin í fyrra hálvleiki ikki fekk sítt spæl at rigga, var tað nógv, sum riggaði hjá Stjørnuni, sum var á odda við fýra málum, tá liðini fóru til hálvleik, 12-8.

Katrin Bertholdsen og Marjun Danberg í hornatøkum (Mynd: Sverri Egholm)

Men í seinna hálvleiki gekk betri hjá neistakvinnum, sum ótu seg meira og meira inn á leiðsluna hjá Stjørnuni. Við støðuni 23-23, tá bara fýra sekund vóru eftir, fekk Neistin brotskast. Maria Nólsoy kundi seta bóltin í netið, og tryggja teimum bláu tvey stig í bólkaspælinum.

Sí myndir frá Neistin-Stjørnan her

Við níggju málum gjørdist Marjun Danberg toppskjútti hjá Neistanum, meðan Julia Nalivko við átta málum gjørdist toppskjútti hjá Stjørnuni.

Leygardagin og sunnudagin í næstu viku verður aftur spælt í steypakappingini hjá kvinnum. Stjørnan og H71 spæla í Klaksvík leygarkvøldið, og Neistin og VB spæla í Havn sunnudagin.

Úrslit í dag
H71 - VB (34-26) 19-10
Neistin - Stjørnan (24-23) 8-12

Soleiðis verður spælt í bólki 2
Leygardagur 23.01.21 kl. 18.00 Stjørnan – H71
Sunnudagur 24.01.21 kl. 14.00 Neistin – VB
Sunnudagur 31.01.21 kl. 14.30 H71 – Neistin
Sunnudagur 31.01.21 kl. 14.30 VB – Stjørnan

Soleiðis verður spælt í bólki 1
Sunnudagur 24.01.21 kl. 14.00 H71 2 – Kyndil
Mikudagur 27.01.21 kl. kl. 20.00 VÍF – StÍF
Sunnudagur 31.01.21 kl. 14.30 Kyndil – VÍF
Sunnudagur 31.01.21 kl. 14.30 StÍF – H71 2