Fótbóltur

Haakon Lunov er nýggjur høvuðsvenjari í Klaksvík

41-ára gamli norðmaðurin hevur ikki nógvar royndir sum høvuðsvenjari men nógvar sum hjálparvenjari og greinari - millum annað í bestu norsku deildini, í Everton og í Celtic.

Lunov hevur seinastu árini verið venjari í lægru norsku deildunum - hjá IF Fram. Nú skal hann taka við eftir Magna Hoseth og standa á odda fyri trýfaldu føroyameistarunum, sum hava Champions League-dystir í summar (Mynd: ki.fo)

2024-01-18 20:24

Agnar Prestá

KÍ hevur nú funnið avloysaran hjá Magna Hoseth. Lagt varð upp til, at tað gjørdist Eirik Bakke, sum var í Klaksvík í vikuskiftinum, men royndi norðmaðurin bakkaði út av familjuávum.

Sí eisini:
Famijan orsøkin til at hann bakkaði út
Alment: Magne Hoseth nýggjur venjari hjá Lyngby

Tað er ein triði norðmaður, sum nú hevur gjørt ein sáttmála við KÍ. Talan er um ein trý-ára sáttmála millum føroyameistararnar og 41-ára gamla Haakon Lunvov. Hesum boðar KÍ frá í kvøld.

- Nevndin í KÍ hevur arbeitt við at finna nýggjan venjara í eina tíð, eftir at Magne Hoseth skifti til Lyngby. Og nú er sáttmáli gjørdur við norska venjaran Haakon Lunov. Talan er um ein venjara við royndum í norskum fótbólti.

Um nýggja venjarin skrivar Klaksvíkar Ítróttarfelag, at hann hevur UEFA Pro Licence venjara útbúgving og hevur verið venjari og hjálparvenjari í bestu deildini í Norra, umframt teimum lægri. Eisini hevur Haakon Lunov arbeitt við spælaramenning í bæði Celtic og í akademinum hjá Everton FC, og hann er útbúgvin Bsc í vísindum og fótbólti.

Haakon Lunov hevur staðið á odda fyri IF Fram síðstu trý árini. Liðið flutti í fjør niður úr triðbestu norsku deildini (Mynd: ki.fo)

Lunov hevur síðst verið venjari í triðbestu norsku deildini. Hetta var hjá IF Fram - liðið endaði 2023 sum niðurflytari og skal í ár spæla í fjórðbestu deildini - Lunov skal standa á odda fyri trýfaldu føroyameistarunum, sum millum annað skulu spæla tveir dystir í Champions League.

Nýggi venjarin hjá KÍ er annars við í tekniska toyminum hjá UEFA sum eygleiðari og greinari, og hann skrivar teknisku frágreiðingarnar frá Champions League og Evropa League.

- Vit eru sera fegin um at hava fingið sáttmála við Haakon Lunov, og vit gleða okkum til samstarvið, sigur Tummas Lervig, formaður í KÍ.

Nýggi venjarin kemur til Føroya mánadagin, tá ið fyrireikingarnar til komandi kappingarár av álvara fara í gongd. Og 30. januar fer KÍ hópurin á venjingarlegu í Portugal sum liður í fyrireikingunum til landskappingina, sum fer í gongd í mars, skrivar ki.fo.

Dagført: 21.39

Vinarliga broyt tínar kennifíla - og privatlívsstillingar fyri at síggja hetta innihald