Hákun og Fücshe eru í Champions League-fjórðingsfinaluni

Annað árið á rað er ein føroyingur í Champions League-fjórðingsfinaluni hjá monnum í hondbólti. Í fjør vóru tað Elias Ellefsen á Skipagøtu og THW Kiel - hesaferð er tað Hákun West av Teigum og Fücshe Berlin. 

Hetta er greitt eftir samanlagda sigurin á Industria Kielce í play-off umfarinum (áttandapartsfinalunum).

Sí eisini: Kiel skal til Fraklands - Flensburg til Fjón

Týska liðið hevði eina seks-máls leiðslu við frá fyrra dystinum í Póllandi, so gestirnir lupu á í kvøld. Kielce skoraði eisini heili 24 ferðir í ógvuliga undirhaldandi fyrra hálvleikinum, har Mathias Gidsel hevði tíggju skot og tíggju mál. Kielce var á odda 24-21 í steðginum og harvið trý mál á muni samanlagt eisini.

Leo Prantner byrjaði inni á høgra vongi, men eftir at italiumaðurin hevði brent tvey skot, kom Hákun á vøllin seint í fyrra hálvleiki.

Tað var eftir steðgin, at 23-ára gamli føroyingurin fekk sína einastu skotroynd, og hann skoraði trygt uppá hana.

Hákun West av Teigum kundi eisini eftir dystin fegnast um víðari luttøku.

Verjuparturin var væl betri hjá heimaliðnum eftir steðgin, og skjótt var javnleikur samanlagt. Eina løtu í seinnu hálvu av 2. hálvleiki fór Kielce burtur frá aftur, og einaferð var +4 til útiliðið, men Fücshe gjørdi bart aftur, og tað endaði 37-37 á kvøldinum.

Seinni í mánaðinum skal oddaliðið spæla Champions League fjórðingsfinalur móti Aalborg.