![placeholder](https://roysni.fo/css/img/banner2x1.png)
Tiraspol, Transnistria, Moldova (Portalurin) - Tað hevur verið ein hendingaríkur fyrri hálvleikur her í seinna Europa League play-off dystinum.
Eftir bert 15 sekund fór alt ljósið á leikvøllinum av onkrari orsøk. Tað var burtur i tvey-trý sekund, men tað tók tveir minuttir at seta dystin í gongd. Helst var tað fyri at tryggjað, at alt var 100 prosent í lagi.
Síðani var Luc Kassi ógvuliga nær við eftir langt innkast, áðrenn Sheriff Tiraspol fekk møguleika úr spískum í næsta álopinum.
Sheriff hevur havt bóltin meira enn í fyrra dystinum, og eftir at KÍ ikki fekk fatur á bóltinum og kom úr trýstinum, varð brotsspark dømt. Dómarin metti, at René Shaki Joensen hevði traðkað á/felt mótstøðumann. Hesum vóru teir í bláum als ikki samdir í - teir hildu Sheriff-spælarin tveitti seg, og tað kundi sá tað út sum, hóast har var eitt lítið sindur av sambandi millum beinini. Eftir stuttan VAR-steðg, har høvuðsdómarin tó ikki fór út at hyggja, varð hildið fast í brotssparkinum, ið moldoviski Luvannor trygt umsetti til 1-0.
Eitt korter og 1-0 til heimaliðið (Mynd: Sverri Egholm)
Nakrar minuttir seinni noyddist Vegard Forren skaddur av vølli. Børge Petersen hevur tó avloyst roynda norðmannin væl, og KÍ fekk reist seg. Í 34. minutti sendi Árni Frederiksberg eitt gróthart og beinrakið hornaspark inn úr høgru, og við fremru stong snittaði Kassi bóltin í málið til 1-1.
Eingin á heimaliðnum fekk fatur á Luc Kassi ella bóltinum...
...og í mun til í Molde fyri 16 døgum síðani fór bólturin inn
Og fagnaður á teimum í bláum (Myndir: Sverri Egholm)
Endliga fekk 10'arin hjá KÍ mál aftur - hann hevur verið heilt nær við í evropeisku dystunum Noreg og Svøríki eisini. Restina av hálvleikinum hendi ikki so nógv, og framvegis er alt púra opið, í mun til hvør fer í tað fínara bólkaspæli.
UEFA Europa League Play-off, seinni dysturin
Í dag, hósdagin 31.08
18.00: Sheriff Tiraspol - KÍ (1-1) - 2-2 samanlagt
16' Luvannor (br.) 1-0
34' Luc Kassi (Árni Frederiksberg) 1-1
KÍ (5-4-1/3-4-3): Nils Jonathan Johansson - Jóannes Kalsø Danielsen, Heini Vatnsdal, Odmar Færø, Vegard Forren (20' Børge Petersen), René Shaki Joensen - Árni Frederiksberg, Deni Pavlovic, Jákup Biskopstø Andreasen (L), Patrick Da Silva - Luc Kassi
Nógvir nærdystir á grasinum í kvøld (Myndir: Sverri Egholm)
Vinarliga broyt tínar kennifíla - og privatlívsstillingar fyri at síggja hetta innihald