Hava vunnið báðar útidystirnar higartil

Tað eydnaðist ikki Føroyum at vinna á Andorra, tá liðini spældu við Djúpumýru í 1. umfari í undankappingini til EM 2025 fyri U21-landslið. Tað eydnaðist tó Eyðuni Klakstein og hansara monnum at fáa trý stig í Andorra, síðst liðið spældi.

Samanlagt hava Føroyar sjey stig fyri fýra dystir, ið má metast at vera góð úrttøka. Í roynd og veru er kósin sett móti bestu undankappingini, sum eitt føroyskt U21-landslið hevur havt - byrjað varð fyri 16 árum síðani.

Stigametið er 11 stig. Hetta varð sett í 2009 og 2010. Til at náa hesum krevst tó, at Føroyar fáa stig móti nakað størri tjóðum enn Andorra og Hvítarusslandi eisini. Ikki tí; útisigrarnir móti hesum liðunum vóru flottir. Serliga dysturin móti Hvítarusslandi har Føroyar vóru á odda 3-0 eina løtu. Jørgen Nielsen skoraði øll málini.

Júst Hvítarussland hevur spælt í Grikkalandi í ár, og og har endaði tað við javnleiki. Spurningurin er so, um ungu føroysku menninir megna at fáa stig har eisini. Nógvir spennandi spælarar eru við, hópurin er næstan tann sama, men er á pappírinum styrktur: Martin Agnarsson úr Viborg er tøkur aftur eftir skaðasteðg. 

Eyðun Klakstein og hansara menn fyrireika seg í Grikkalandi (Myndir: FSF)

Áki Johannesen var dagsins spælari í steypafinaluni, og nesmaðurin hevur víst seg væl fram á U21 eisini (Mynd: FSF)


Martin Agnarsson er aftur á U21-landsliðnum (Mynd: FSF)

Føroyska ferðalagið kom uppá pláss í Tripoli mánakvøldið. Síðani hevur fyrireiking og hvíld verið á skránni. Grikkaland er stórfavorittur á pappírinum - veddingarfyritøkur hava føroyskan sigur til at geva peningin tólv ferðir aftur og javnleik til odds 6 (+) - men liðini eru í løtuni jøvn á stigatalvuni. Føroyska U21-landsliðið hevur eisini gjøgnum árini fleiri stór úrslit at vísa á.

Dysturin í morgin byrjar klokkan 14 føroyska tíð, og Televarpið vísir hann.

Tøl: FaroeSoccer

5. umfar - í morgin: