Havnarfinala hjá kvinnum

Nú er greitt, at steypafinalan hjá kvinnum við Tjarnir leygardagin verður ein grannauppgerð millum Neistan og Kyndil - somu lið sum eisini vóru í steypafinaluni í fjør.

Neistin vann í gjár 25-22 í inntensari hálvfinalu móti H71 í Hoyvíkshøllini. Tað var nevniliga spenningur til tað síðsta. Neistakvinnur vóru á odda 14-12 í steðginum, men tá ellivu minuttir vóru eftir av dystinum var H71 á odda við trimum málum, 21-18.

Tær í bláum komu upp á javnt næstu løtuna og seinastu minuttirnar valdi H71-venjarin at spæla við sjey leikarum í álopinum. Tvær ferðir eydnaðist tað Neistanum at fáa fatur á bóltinum og smekka hann í netið. Dysturin vendi og Neistin vann 25-22, samanlagt 46-44.

Mótstøðulið verður Kyndil. Kyndilskvinnur vunnu greitt móti Stjørnuni í fyrru hálvfinaluni við tíggju málum.

Turið Arge Samuelsen og hinar í Kyndli hitta aftur í ár Neistan í steypafinaluni. í fjør vann Kyndil 31-27 (Mynd: Sverri Egholm)

Í seinnu hálvfinaluni í dag var munurin ikki líka stórur, men finaluplássið hjá Kyndli var ongantíð í vanda. Kyndil vann dystin í dag 35-30. Hálvleiksstøðan var 17-15. Samanlagt vann Kyndil 74-59.

Stóra steypafinaluvikuskifti verður í nýggju stórhøllini við Tjarnir. Finalurnar hjá teimum vaksnu verða leygardagin.