HB kann fáa ógvuliga hart lutakast

Stórfeløg úr Póllandi og Kroatia og góð lið úr uppaftur hægri styrkismettum deildum. Hetta er tað, sum HB kann renna seg í, tá lutkastið til 2. umfar í Conference League verður klokkan 13.

Sum steypavinnari í Føroyum hoppar HB 1. umfar um. Tað hevur sínar fíggjarligar fyrimunir, men sum ikki-styrkismett er møguleikin fyri at møta sterkum liðum í 2. umfari stórur.

Her eru møguleikarnir hjá HB í 2. umfari í Conference League:
Legia Warszawa (Pólland)
HNK Hajduk Split (Kroatia)
GFK Tikves (MKD) - Breiðablik (Ísland)
FK Austria Wien (Eysturríki)
FK Mladá Boleslav (Kekkia)

Tað er mótsstøðan úr Norðurmakedónia ella Ísland - vinnarin av hesum dystinum - sum hevði verið best at fingið hjá HB. Ikki tí; Patrik Johannesen og Breiðablik kunnu geva HB nógar trupulleikar, og í so fall hevði talan helst verið um tættar dystir.

Patrik Johannesen í landsdysti fyri Føroyar. Áleyparin kann renna seg í HB, um hann og Breiðablik koma víðari (Savnsmynd: Sverri Egholm)

Hinir fýra møguleikarnir í lutakastinum eru lið úr ovaru hálvu av Evropa, tá tað snýr seg um deildir. Sambært styrkismetingini hjá UEFA spæla tey í deildum frá nummar 10 til og við 21 av teimum 55. Betrideildin er nummar 38 - hetta serliga takkað góðu evroeisku úrslitunum hjá B36 og KÍ seinastu árini.

Liðini úr lægri deildunum av hesum - Póllandi og Kroatia - eru stórfeløg í hesum londum. Tað hevði avgjørt verið ein stór og spennandi avbjóðing at hitt Legia Warszawa ella Hajduk Split.

Hjá HB snýr tað seg helst um at raka 3-talið í lutakastinum (Mynd: uefa.com)

Dystirnir í 2. umfari í Conference League verða spældir 25. juli og 1. august. Tað er møguligt, at heili fýra føroysk feløg vera við tá.

Um KÍ tapir fyri Differdange í 1. umfari í Champions League, so enda føroyameistararnir her. B36 og Víkingur skulu 11. og 18. juli royna at spæla seg víðari úr 1. umfari í Conference League.

Møguleikarnir hjá KÍ - um liðið fer út úr Champions League beinanvegin:
PFC Ludogorets 1945 (BUL) - FC Dinamo Batumi (GEO)
FC Flora Tallinn (EST) - NK Celje (SVN)
Hamrun Spartans FC (MLT) - Lincoln Red Imps FC (GIB)
FC Dinamo Minsk (BLR) - FC Pyunik (ARM)
FC Ordabasy (KAZ) - FC Petrocub (MDA)
Vikingur Reykjavík (ISL) - Shamrock Rovers FC (IRL)

Her er talan um taparan í hesum dystunum (lið sum koma úr CHL)

Møguleikarnir hjá Víkingi, um liðið kemur víðari:
KAA Gent (BEL)
Stjarnan (ISL) - Linfield FC (NIR)
FC UNA Strassen (LUX) - KuPS Kuopio (FIN)
FC Vaduz (LIE)
Brøndby IF (DEN)

Møguleikarnir hjá B36, um liðið kemur víðari:
SK Brann (NOR)
BK Häcken (SWE)
FCB Magpies (GIB) - Derry City FC (IRL)
Valur (ISL) - KF Vllaznia (ALB)
Cliftonville FC (NIR)

Sí alt á síðuni hjá UEFA Conference League á uefa.com.
Lutakastið verður klokkan 13 føroyska tíð og kann stroymast á heimasíðuni hjá UEFA.