Heldur umstrídd áseting av dystinum í Hoyvík

Upprunaliga var ætlanin, at báðar FM-fjórðingsfinalurnar hjá monnum skuldu spælast sunnudagin 6. apríl. Hetta var útgangspunktið í kalendaranum - tó uttan at tað var endaliga ásett.

Tá ætlanin fyri endapælsskránna kom út til stutta hoyring hjá feløgunum eftir seinasta umfar í grundspælinum sunnukvøldið 30. mars hevði H71 eina viðmerking: Man ynskti at fjórðingsfinalan móti Neistanum skuldi setast á til fríggjakvøld 4. apríl heldur.

Høvuðsorsøkin er, at konfirmatiónir eru í Hoyvík sunnudagin 6. apríl.

Hetta fyllir helst nakað rundanum, men burdi ikki havat eina heilt stóra ávirkan á ein hondbóltsdyst. Hetta kravið varð eftirlíkað av kappingarnevndini hjá HSF mánadagin. Helst millum annað tí at dysturin - sum nevnt - ikki varð endaliga ásettur áðrenn. Allir dystirnir í grundspælinum eru ásettir til dagfesting og klokkuslett langt áðrenn og verða heilt sjálvdan fluttir uttan góða orsøk. 

Neistin mótmælti í fyrstu syftu. Tá felagið  so mánakvøldið vildi hava hetta málið til Aganevndini, varð serliga grundgevingin um ymiskar fyrireikingartreytir nýtt. Har hevði man allatíðina arbeitt útfrá, at dysturin verður ein sunnudag, og ávirkar hetta tí vikuna. Víst varð á at hetta ert kundi verða til fyrimuns fyri H71.

Í dag, mikudagin 2. apríl, er tó endaliga greitt, at H71-Neistin verður spældur fríggjakvøldið klokkan 19 heldur enn sunnnukvldið klokkan 19. Eftir niðurstøðina hja Aganevndini er man heldur ónøgdur í Neistanum, men har royna teir nú bara at hugsavna seg um sjálvan dystin, sum er púra avgerandi fyri kappingarárið.

Sí eisini: FM-fjórðingsfinalur á skránni um vikuskifti

FM-fjórðingsfinalurnar í Burn-deildini
Fríggjadagin 4. apríl
19.00: H71 - Neistin

Sunnudagin 6. apríl
16.00: StÍF - KÍF

Kyndil og VÍF eru beinleiðis víðari til hálvfinalurnar

Til ber at fylgja gongdini í øllum dystunum ovast á forsíðuni á Portalinum og roysni.fo. Dystirnir kunnu stroymast á live.hsf.fo.

Portalurin hevur tosað við fleiri persónar, sum á ymsan hátt hava havt við hetta málið at gera. Tað er ymiskt, hvussu stórt fólk halda tað er, men serliga uttanfyri HSF og H71 verður víst á, at tað ikki er heilt rætt, at ein so avgerandi dystur verður ásettur á hendan hátt - ella at tað skal so mikið lítið til at flyta eina FM-fjórðingsfinalu frá ætlaða dystardegnum.

Av tí at H71 hevur heimavøll, hevur tað helst vektað eitt sindur í avgerðini. Men tað er ikki serliga til fjórðingsfinaluna sjálva, at man kann tosa um fyrimun annan vegin. Tað er kanska heldur til fyrstu hálvfinaluna, sum er ásett hóskvøldið 10. apríl.

Um H71 vinnur, so skulu hoyvíkingar spæla móti VÍF. Um tað er Neistin, so er tað Kyndil, ið møtir vinnaranum av hesum dystinum.

Kyndil og VÍF endaðu á teimum báðum ovastu plássunum í grundspælinum. Hetta gevur beinleiðis hálvfinalupláss, og man skal møta sínum mótsstøðuliðið fyrstu ferð fáar dagar eftir, at tað hevur verið í avgerandi dysti. Nú veða tað so fimm heilir dagar ímillum hjá H71/Neistanum ístaðin fyri tríggjar, og harvið kann man vísa á, at partur av fyrimuninum hjá øðrum hálvfinaluliðnum verður nakað minni, enn um tað hevði verið sum vanligt.

Livst, so spyrt.