Helgi og Tórvør gjørdust FM-vinnarar

Tað gjørdust tveir súkklarar úr Fjallasúkklufelagnum, sum funnu føroyameistaraskapin í vegasúkkling, sum varð hildin í Sandoynni leygardagin.

Helgi Winther Olsen vann hjá monnunum og Tórvør Østerø Vang hjá kvinnunum.

Startur og mál var í Skálavík. Leiðin gekk úr Skálavík, til Sands og Skopunar, har vent varð, og síðan gekk leiðin aftur til Húsavíkar og Dals og aftur til Skálavíkar.

Hesin teinur er 51 kilometrar langur. Í opna bólkinum hjá monnum, hvar hesin teinur súkklaður tvær ferðir, 102 kilometrar. Kvinnur og aldursbólkar U23, M40, M50 súkklaðu eitt umfar, og síðan til Sands og aftur til Skálavíkar. Hesin teinur er 69 kilometrar. Motiónsbólkurin súkklaði teinin einaferð.

Ongin bjóðaði Helga av
Hetta kappingarárið hava vit sæð nógvar og spennandi dystir millum Helga Winther Olsen og Dáva Magnussen. Bæði í tíðarkoyring og í vegasúkkling hava verið fáir metrar millum teir, og líka so fá sekund. Sera javnir, sera ofta.

Dávur er júst farin av landinum at lesa, og tí var tað ongin, ið kundi bjóða Helga av til FM-kappingina.

Hilmar Hansen, Tórarinn Didriksen, Kjartan Egholm, Bogi Gregersen og Gunnar Dahl-Olsen royndu sum frægast at fáa Helga aftur, men einsamallur, og til tíðir í kolandi mótvindi, so økti Helgi kortini aftur til feltið, og góðar tríggjar tímar seinni, súkklaði Helgi Winther Olsen úr Fjallasúkklufelagnum ein tryggan sigur heim.

Tað gekk ein lítil hálvur tími áðrenn nummar tvey kom um málstrikuna. Nummar tvey gjørdist Hilmar Hansen úr Norðstrok.

Frá vinstru Hilmar Hansen, Helgi Winther Olsen og Casper Rosen

Spenningur um bronsuna
Fleiri súkklarar bardust um bronsuna. Leingi var eingin ivi í, at dysturin um annað og triðja pláss stóð millum Hilmar Hansen og Gunnar Dahl-Olsen. Teir høvdu slitið væl og virðiliga leysir frá restini av súkklarunum, og einsamallir eltu teir Helga og gjørdu sær ætlanir um at sleppa av við hvønn annan rætta tíðspunkt.

Beint sum finalan millum teir skuldi vera og einans smáir 15 kilometrar vóru eftir á mál, vildi so illa, at Gunnar punkteraði og noyddist at steðga. Spenningurin um sprintin teirra millum um málstrikuna, báðir kvikir og snildir súkklarar, bleiv tí av ongum.

Í bólkinum, ið elti teir, gjørdist tí alt meira spennandi, tí nú var dystur um bronsuna. Casper Rosen, Tórarinn Didriksen, Kjartan Egholm og Bogi Gregersen høvdu allir møguleika at vinna sær eitt triðjapláss. Casper leyp á í brekkuni móti Dali síðstu ferð, og fekk slitið seg leysan. Tórainn koyrdi á, tað hann kundi, men Casper Rosen úr Tórshavnar Súkklufelag, sum hevur vant nógv seinasta árið, slapp undan, kilometur fyri kilometur, og løtu seinni kundi hann súkkla um málstrikuna, góðan minutt framman fyri Tórarinn. 

Hóast EM vinnari í ½ ironman, so valdi Andrass Joensen at súkkla 70 kilometrar, heldur enn longra teinin. Andrass skal í komandi viku aftur luttaka í stórari kapping uttanlands, og tí avgjørdi hann ikki at súkkla longra teinin.

Sum altíð er Andrass væl fyri. Í Sandoynni var onki undantak. Andrass Jóensen úr Føroya Triathlonfelag vann tí trygt sín bólk í M50. Einar Vang úr Fjallasúkklufelagnum, sum eisini er kendur frá Team Rynkeby, gjørist nummar tvey og grand old man innan føroyska súkkling, Sverri Mohr Edvinsson úr Tórshavnar Súkklufelag, nummar trý.

Tað var sera stór luttøka í ár. Hesaferð var eisini ein súkklari í U23 bólkinum. Tað eru nøkur ár síðan vit hava upplivað tað. Líkindini at súkkla vóru ikki góð. Rutan var hørð, og rættiliga nógvur vindur var, og tí er tað eitt bragd, at Niklas Hallgren Niclasen úr Fjallasúkklufelagnum megnaði at súkkla yvir 100 kilometrar stóran part einsamallur.

Umframt at Niklas Hallgren Niclassen spælir flogbólt við besta liðið hjá Mjølni, hevur hann í ár valt at royna seg í súkkling eisini. Hann venur bæði fjallasúkkling og vegasúkkling, og hevur, eins og Helgi, valt at royna seg í kappingum í báðum greinum. Niklas valdi at súkkla fulla teinin sum opin bólkur hjá monnum súkklaði, hóast teinurin hjá U23 var styttri, og gjørdist nummar 8 í opnum bólki.

Maria Svabo Hansen og Tórvør Østerø Vang saman við Linjohn Christiansen, borgarstjóra í Skálavík, sum handaði heiðursmerki og steyp

Nýtt bros hjá kvinnum
Allir 30 súkklarar, menn og kvinnur, fóru avstað í senn, og eyðsæð skipaðu fólk seg í bólkar.

Hjá kvinnum eydnaðist Tórvør Østerø Vang at sleppa avstað undan Mariu Svabo Hansen, sum báðar kappaðust í opnum bólki um FM heiti. Fleiri kvinnur vóru við, men tær kappaðust í motiónsbólkinum sum súkklaði styttri tein. Tí skuldi dysturin standast millum hesar báðar.

Tað var ”Miss Rynkeby”, ið helt munin á mál og gjørdist FM vinnari 2021. Tórvør Vang úr Fjallasúkklufelagnum, ið hevur súkklað við Team Rynkeby í nú fleiri ár, vann FM-gullið. Maria Svabo Hansen úr Tórshavnar Súkklufelag vann fyri vikum síðan LM Kring Føroyar. Hon vann trygt tá, men í FM-kappingini mátti hon eitt trin niður á sigurspallinum, og taka móti silvurheiðursmerkinum. Báðar stóðu tær seg væl, og høvdu eisini staðið seg væl millum mennirnar.

Borgarstjórin í Skálavík, Linjohn Christiansen, handaði heiðursmerkir og ferðasteyp til vinnararnar. Alt úr føroyskum gróti.  

Kelda: ssf.fo