Hesir koma til Føroya fyrst í september

Føroyska A-landsliðið við monnum skal fyrstu vikuna í setpember spæla tríggjar HM-undankappingardystir á heimavølli.

Møguleikarnir at fáa stig eru størri móti Ísrael og serliga móti Moldova, men tað er á ymsan hátt størst spenningur um dystin, ið liggur ímillum har: 4. september spæla Føroyar og Danmark á fyrsta sinni undankappingardyst á A-landsliðsstøði í Føroyum.

Í gjár kunngjørdi Håkan Ericson hvørjir 25 eru úttiknir til føroyska liðið - fyri lítlari løtu síðani setti Kasper Hjulmand á tíðindafundi navn á teir 26 leikararnar, ið skulu vera partur av danska hópinum í næstum. 

Andreas Skov Olsen gjørdi av álvara vart við seg í 4-0 sigrinum í venjingardystinum móti Føroyum í Herning síðstan oktober. Hann og Viljorur Davidsen skulu aftur møguliga dystast á Tórsvøllu um ellivu dagar (Mynd: Sverri Egholm)

Teir allarflestu vóru við til EM-endaspælið í summar, har Danmark varð sligið út móti Onglandi í hálvfinaluni eftir longda leiktíð. Dysturin móti Skotlandi í Parkini næsta mikudag verður tann fyrsti hjá dønum síðani - hetta er fyrsti hópur, ið Hjulmand hevur úttikið, har Christian Eriksen ikki hevur verið við. Á tíðindafundinum varð spurt um sambandi við Eriksen. Landsliðsvenjarin avdúkaði, at hann hevði vitjað hann á Fjóni beint eftir EM-endaspælið og fyri heilt stuttum í Italia: - Christian skal koma fyri seg eftir sínari egnu ferð, segði Hjulmand.

Heilt nýggir menn í danska A-landsliðsshópinum eru 24-ára gamli Rasmus Nissen Kristiansen úr RB Salzburg og 19-ára gamli Mohamed Daramy úr FCK. Tann fyrrnevndi er bakkur og hevur eina fortíð í Ajax Amsterdam. Hin er ein spennadni kantur við serstøkum dygdum, sambært Hjulmand, og hann er ávegis til Ajax nú fyri stóran keypsprís.

Nissen og Daramy hava ongan A-landsdyst men annars eru nógvar royndir í danska hópinum, ið á pappírinum er ógvuliga sterkur. Danmark er oddalið í HM-undankappingarbólkinum eftir trý umfør - við fullum stigatali og málúrttøkuni 14-0. 1. september taka danir móti Skotlandi, tríggjar dagar seinni er brak á Tórsvølli, og Ísrael vitjar í Parkini 7. september.


Málverjar: 
Kasper Schmeichel (Leicester)
Jonas Lössl (FC Midtjylland)
Frederik Rønnow (Union Berlin)

Miðverjar: 
Simon Kjær (AC Milan)
Andreas Christensen (Chelsea)
Jannik Vestergaard (Leicester)
Joachim Andersen (Crystal Palace)

Bakkar/Vongbakkar: 
Jens Stryger Larsen (Udinese)
Daniel Wass (Valencia)
Joakim Mæhle (Atalanta)
Nicolai Boilesen (FCK)
Ramus Nissen (Salzburg)

Miðvallarar: 
Pierre-Emile Højbjerg (Tottenham)
Thomas Delaney (Dortmund)
Christian Nørgaard (Brentford)
Mikkel Damsgaard (Sampdoria)
Phillip Billing (Bournemouth)
Rasmus Falk (FCK)
Anders Christiansen (Malmø)

Áleyparar og kantar: 
Yussuf Poulsen (RB Leipzig)
Andreas Skov Olsen (Bologna)
Kasper Dolberg (Nice)
Jonas Wind (FCK)
Martin Braithwaite (Barcelona)
Mohamed Daramy (FCK)
Andreas Cornelius (Trabzonspor)