HM-undankapping: Hópurin verður kunngjørdur klokkan tíggju

Tað er ikki heilt víst, júst hvussu nógvir leikarar nýggi landsliðsvenjarin hjá føroyska manslandsliðnum í fyrstu atløgu tekur út til teir tríggjar HM-undankappingardystirnar, sum vera á heimavølli næsta vikuskifti.

16 kunnu verða á dómaraseðlanum til hvønn dyst, og tvær útskiftingar kunnu gerast í hópinum í vikuskiftinum. Harvið er sannlíkt, at í hvussu er átjan leikarar eru úttiknir, og at nakrir síðani skulu halda seg til reiðar, um skaðar, korona ella annað raka hópin í vikuni upp til kappingina.

Peter Bredsdorff-Larsen og hansara toymi hava í øllum førum nakrar spennandi, men torførar avgerðir at taka. Føroyska manslandsliðið hevur allarhelst ongantið havt so nógvar leikarar tøkar, ið spæla og avrika á eins høgum støðu, sum teir í bruttohópinum, sum hevur verið savnaðir í tvær vikur nú, gera nú. Fáir spæla til dagliga í Føroyum, og kappingin um plássini er hørð. Fleiri hava verið við í nógv ár og hava verið við til at "bygt landsliðið uppaftur", men ungir og dugnaligir banka uppá, og nakrir komu inn á A-landsliðið í fjør.

Ein teirra var Elias Ellefsen á Skipagøtu, sum nakað eftir, at hann kom flúgvandi inn móti Ukraina - og stutt seinni var við til at basa Kekkia - vann svenska meistarheiti í sínum fyrsta kappingarári í IK Sävehof.

Spælskiparin úr Hoyvík er ein lyklaleikari hjá svensku meistarunum, serliga í álopsspælinum, og hevur í heyst av álvara gjørt vart við seg í evropeiskum dystum. Millum annað 15. desember í Partille Arena móti týska oddaliðnum Magdeburg, men har fekk Elias harða viðferð frá millum annað dugnaliga norska strikuleikaran Magnus Gullerud.

Elias kann ógvuliga nógv við bóltinum, men spurningurin er, um partar av andliti hansara eru nóg lektir eftir stoytirnar í Partille Arena 15. desember (Mynd: Sverri Egholm)

19-ára gamli føroyingurin fullførdi dystin, men røntgen-myndir dagin eftir vístu, at hoyvíkingurin hevði brotið høkuna og kjálkabeinið, eftir at hann hevði smekkað høkuna í gólvið í støðuni.

Síðstu 24 dagarnar hevur Elias á Skipagøtu harvið ikki fingið spælt, og heldur ikki vant nakað serligt - hann megnar nústaðni at eta fasta føði og ikki bert rísingreyt og suppu. Hetta segði hann sjálvur við FM1/Trok leygardagin, har leikarin ið so stórar vónir eru til staðfesti, at tað er ivasamt, um hann kann spæla í vikuskiftinum - 50-50 metti hann. 

Venjarin var eisini inni á ivamálinum, og segði við Sjúrð Hildarson Hoydal, at hettta verður greiðari seinni í vikuni. Tað er tó helst eigini ivi um, at Elias verður úttikin - hvussu fullfíggjaði listin sær út vita vit heilt stutt eftir klokkan tíggju.

Tíðindafundur er á skránni í Bank Nordik fyrrapartin. Til ber at fylgja beinleiðis við á FM1 og radio.fo. Vit leggja eisini føroyska hópin út sum skjótast og hava annað tilfar harfrá.

Les eisini: HM-avbjóðingin á heimavølli nærkast

Undankappingin til HM 2023 - 1. umfar
Høllin á Hálsi

Fríggjadagin 14. januar 
19.30: Føroyar - Luksemborg
(Lettland - Italia)

Leygardagin 15. januar
19.30: Føroyar - Italia
(Luksemborg - Lettland)

- Hendan seinnapartin spæla kvinnurnar hjá H71 seinnu áttandapartsfinaluna í EHF Europa Cup-kappingini móti serbiska Nis. Dysturin verður í Høllini á Hálsi klokkan 14.

Sunnudagin 16. januar
18.00: Føroyar - Lettland
(Italia - Luksemborg)