Hondbóltssambandið fingið fleiri føroysk EM-atgongumerki

Í fyrstu atløgu fingu Føroyar ikki so nógv atgongumerki til bólkaspælsdystirnar í Basel í november og desember.

Orsøkin var, at Føroyar eru í bólki við verstjóðini Sveis, og at sveisiska hondbóltssambandið sat tungt á meginpartinum av atgongumerkjnum.

HSF bað tó beinanvegin um fleiri enn tey umleið 500 atgongumerkini, harav tey flestu skjótt vórðu seld, og í dag boðar Hondbóltssambandið frá, at tað er eydnast at fáa fatur á nøkrum fleiri "føroyskum" atgongumerkjum til EM-endaspælið hjá kvinnum.

Tey kunnu keypast á hesari leinkjuni.

Tá ein kemur til teigin “Promotion code” skal EURO-FAR skrivast/veljast.

Føroysku EM-dystirnir
Fríggjadagin 29. november: Sveis - Føroyar
Sunnudagin 1. desember: Kroatia - Føroyar
Týsdagin 3. desember: Føroyar - Danmark

Í løtuni ber ikki til at keypa dagsatgongumerki.