Hørður móti Gilla í donsku steypakappingini

Í hesari vikuni eru 1/16-finalurnar í donsku steypakappingini spældar. Millum úrslitini vóru 0-9 sigur hjá FCK á Lyseng úr fjórðbestu deildini og 4-3 sigur hjá Viborg á Esbjerg.

Martin Agnarsson er í løtuni ikki tøkur fyri Viborg. Ungi vinstrabeinti havnarmaðurin hevur verið undir skurði tí hann hevur brotið sama østbein tvær ferðir.

Daniel Johansen og Heini Fossdalsá Sørensen vóru einastu føroyingar í eldinum í umfarinum í vikuni. Daniel byrjaði á vinstra bakki hjá Thisted, ið legði seg á odda móti superligafelagnum Silkeborg men tapti 1-3. Heini kom inn til sín fyrsta dyst fyri liðið úr triðbestu deildini. U21-landsliðsmiðvallarin hevur júst skrivað undir sáttmála við Thisted.

Tveir føroyingar, ið ikki vóru á vøllinum í vikuni men sum skulu hittast skjótt, eru Hørður Askham og Gilli Rólantsson Sørensen. AB spardi Hørð, tá tað við neyð og deyð eydnaðist at sláa FA 2000 út á Frederiksberg. Gilli hevur verið darvaður av skaða síðani landsdystirnar tíðliga í mánaðinum, og royndi tvørmaðurin hjá Vejle hevur ikki spælt síðani fyrra hálvleik móti Moldova á Tórsvølli.

Vejle gjørdi sítt arbeiði og vann 7-0 á seriuliðnum tst Fodbold. Eftir lutakastið er greitt, at søguríka jútska felagið skal ein túr til økið stutt norðanfyri Keypmanahavn í næsta umfari. Hørður Askham og AB taka ímóti í áttandapartsfinalu, ið skal spælast einaferð í tíðarskeiðnum 31. oktober - 2. november. Viborg skal spæla á heimavølli móti FC Norðsjælland.


Mynd: Oddset Pokalen