Innbrot hjá Morata undir dystinum í Føroyum

Fríggjakvøldið leikti áleyparin Álvaro Morata allar 90 minuttirnar á Tórsvølli, har Spania vann tryggan 4-1 sigur á Føroyum. Hetta var púra ódramatiskt hjá Morata, men heima í Madrid var innbrot í hansara húsið.

Daily Mail skrivar, at tveir vápnaðir rænarar brutu inn ígjøgnum eitt vindeyga í húsinum í ríka býarpartinum La Moraleja, har fyrrverandi Chelsea-leikarin býr saman við konuni Alice Campello og eitt ára gomlu tvíburasynirnir. Tey vóru heima saman við einari barnagentu, og sambært miðlunum kom eingin av teimum til skaða undir innbrotinum.


(Morata í føroyska brotsteiginum fríggjadagin - Mynd: Jens Kr. Vang)

Fleiri miðlar skriva um hendingina, og at Morata fekk boðini eftir dystin móti Føroyum. 26-ára gamli áleyparin ella familja hansara hevur tó ikki verið úti nakrari almennari útmelding; tað hava spanska fótbóltssambandið og felag hansara Atletico Madrid heldur ikki. 

Morata er í hópinum hjá Spania, sum í kvøld spælir á heimavølli í júst Madrid. Dysturin er ímóti Svøríki, og talan er um oddadyst í bólki okkara.