Jákup leingir við KÍ

Hann er 24 ár, men hevur verið partur av Betri deildini seinastu átta árini. Nú hevur Jákup Biskopstø Andreasen longt við KÍ og bindir seg til 2024.

Jákup Biskopstø Andreasen spældi sín fyrsta dyst 1. oktober 2014 tá KÍ vann 3-0 á Skála. Síðani hevur hann leikt 217 dystir fyri besta liðið hjá KÍ.

Í 2019 gjørdist tann tá einans 20 ára gamli miðvallarin liðskipari, og var fyrsti maður at lyfta FM steypið fyri KÍ síðan pápi hansara lyfti steypið í 1999.

- Í seinastuni hevur lokali miðvallarin bitið seg fastan í A-landsliðshópin, og eru vónirnar stórar og bjartar um framtíðina, skrivar KÍ á heimasíðuni.