Jana og Viborg eru væl við í oddinum

Hon er størsti álopsprofilurin hjá Føroyum, sum um bent undir seks vikur skulu spæla sín fyrsta dyst í EM-endaspælinum í Basel.

Tí kann tað hava stóran týdning, at Jana Mittún er so vælspælandi, sum hon er í løtuni fyri Viborg. 20-ára gamli bakspælarin úr Hoyvík fekk ikki heilt nógv burtur úr í mun til málskjóting í dag, men skoraði so tvey mál uppá fýra skot.

Jana er tó millum tær allarfremstu í fremstu donsku deildini, tá tað snýr seg um upplegg. Nógvar góðar fríspælingar vóru í venjingardystinum hjá Føroyum í Slovakia í síðsta mánða, og tær síggjast eisini í "Kvindeligaen". 

Jana Mittún skifti til Viborg á sumri 2023. Leikluturin var ikki so stórur síðsta kappingarár, men tykist hann at vera størri nú (Mynd: Viborg HK)

Í 27-25 sigrinum á Aarhus í dag legði Jana Mittún upp til yvir ein fjórðing av málinum hjá Viborg: Næstseinastu hond á áðrenn sjey mál, umframt eitt vunnið brotskast. 

Viborg er við sigrinum á 4. plássi við 10 stigum av 12 møguligum.

Undan umfarinum kunngjørdi "Tophåndbold", at Jana Mittún var á topp-fimm listanum yvir tær við flest uppleggum í deildini (20) Nú er talið nakað hægri, og millum annað hevur hoyvíkskvinnan lagt seg undir liðuna á heimsins besta kvinnuliga hondbóltsspælara, Henny Reistad, við 27 uppleggum í seks dystum.

Sí eisini: Jana Mittún vil flyta seg og føroyskan hondbólt longur

Blandað umfar hjá hinum landsliðsspælarunum - fleiri spældu javnt

Ovast á omanfyrinevnda lista er Emma Navne, spælskipari hjá København Håndbold við 35 uppleggum. Hon finnur millum annað javnan Pernille Brandenborg.

Sterki strikuspælarin er ein lykil hjá Føroyum í bæði verju og álopi, og landsliðsliðskiparin var ógvuliga effektiv í dag: Hon skoraði fýra mál - uppá fýra skot - tá København vann 26-31 á botnliði í Bjerringbro. København havur átta stig.

Pernille Brandenborg var púra trygg á strikuni í dag (Savnsmynd: Sverri Egholm)

Tað kundi verið ein føroyingauppgerð í Skanderborg seinnapartin, men Súna Krossteig Hansen er framvegis ikki komin heilt fyri seg eftir fótskaðan, sum hon fekk undir landsliðsvenjing síðst í september. Maria Pálsdottir Nólsoy skoraði eitt mál fyri Horsens í spennandi dystinum, sum endaði 28-28. Skanderborg og Horsens hava ávikavist 4 og 3 stig.

Ringkøbing er niðast við ongum stigi. Rakul Wardum og Ringkøbing taptu við tíggju málum í Ikast í dag. Landsliðsmálverjin var bert inni heilt stutt og bjargaði eitt av trimum skotum í opnum spæli. Rakul tók ikki nakað av teimum trimum brotskøstunum, sum hon var inni til.

Fyri ein uppflytara er tað avgjørt umráðandi, at málverjin stendur væl. Annika Fríðheim Petersen hevði nakrar týðandi bjargingar í javnleiki í gjár (Savnsmynd: Sverri Egholm)

Hin landsliðsmálverjin hevði 7 bjargingar uppá 24 skot í gjárkvøldið. Harvið beint undir 30 prosent og ein góðkendur dystur hjá Anniku Fríðheim Petersen. Uppflytararnir EA Alborg spældu javnt móti Silkeborg-Voel - annar javnleikurin í ár - og hevur nú fýra stig. Lív Sveinbjørnsdóttir Poulsen skifti eisini til Aalborg í summar. Lív hevði tvey skot og skoraði eitt mál.

Stigatalvan í fremstu donsku sæst her - á Tophåndbold síggjast eisini úrslit og ymisk hagtøl

Sjey føroyingar spæla í fremstu donsku deildini. Allar eru í landsliðshópinum, sum savnast í Føroyum mánadagin. Í seks dagar eru umráðandi EM-fyrireikingar á skránni - Claus Mogensen og Simon Olsen skulu skjótt taka hópin út.

Sí eisini: Kvinnurnar hava umráðandi EM-fyrireikingar næstu tíðina