Jóan Símun hevur nú spælt 90 A-landsdystir

Føroyar hava nú tveir fótbóltsspælarar, sum hava spælt 90 A-landsdystir. Annar náddi hesum málinum fyri nøkrum árum síðani, hin náddi tí í gjár, og báðir eru toftamenn. 

Fróði Benjaminsen spældi 94 skrásettar dystir millum 1999 og 2017 og tók landsliðsmetið frá Óla Johannesen. Hann var liðformaður og lyklaspælari leingi. Harði miðvallarin gekk ofta á odda í serliga nærdystunum, og skoraði hann eisini 6 mál. 

Fróði Benjaminsen takklar her Zlatan Ibrahimovic á Friends Arena 

Fróði Benjaminsen sæst her aftast til høgru í fagnaði eftir málið hjá Jóan Símuni Edmundsson í minniliga sigrinum í Grikklandi fyri skjótt tíggju árum síðani

Jóan Símun Edmundsson spældi á fyrsta sinni á A-landsliðnum, tá Frakland vitjaði í august 2009. Hetta var stutt eftir, at toftamaðurin, sum tá var í Newcastle, hevði skorað einsamalla málið fyri U21-landsliðið móti Russlandi.

Jóan Símun hevði júst havt 18-ára føðingardag, tá hann kom í gongd á A-landsli. Nú, 15 ár seinni, hevur hann spælt samanlagt 90 landsdystir. Nú 33-ára gamli maðurin er álopskendur og hevur mest spælt sum fremsti maður á A-landsliðnum, hóast hann ikki er "typiskur áleypari"

Hansara sereginleikar eru millum annað at taka ímóti bóltinum. Jóan Símun Edmundsson hevur skorað átta mál - nøkur av teimum heilt umráðandi og sermerkt: Her stendur málið í 1-0 sigrinum í Grikkalandi í 2014 fremst, og síðst Jóan Símun skoraði á landsliðnum var í 2-1 sigrinum á Turkalandi á Tórsvølli fyri tveimum árum síðani.

Seks av teimum átta málunum hjá Jóan Símuni eru komin í sigrum. Áleyparin skoraði eisini fyrsta føroyska málið í Nations League yvirhøvur í 3-1 sigrinum á Malta á Tórsvølli. Hetta var í 2018. Seinni í ár, tá hendan Nations League kemur móti endanum, kann Jóan Símun Edmundsson taka metið fyri talið av landsdystum. Hann er eisini bert tvey mál frá at javna málmetið: Rógvi Jacobsen og Klæming Andrasson Olsen hava báðir 10 mál. 

Jóan Símun spælir nú á landsliðnum saman við yngra beiggjanum Andriasi Edmundsson - her koma teir á vøllin undan 1-1 dystinum í gjár (Mynd: Sverri Egholm)

Tøl: FaroeSoccer og FSF