Kunnu blanda seg millum tey størru í bólkinum

Klokkan 19 í kvøld verður bríkslað í gongd í Andorra, har føroyska U21-landsliðið seinastu dagarnar hevur fyrireika seg til fjórða dystin í EM-undankappingarbólki G

Bólkur G
1. Portugal 9 stig (3 dystir)
2. Grikkaland 5 stig (3 dystir)
3. Kroatia 4 stig (2 dystir)
4. Føroyar 4 stig (3 dystir)
5. Hvítarussland 3 stig (6 dystir)
6. Andorra 3 stig (5 dystir)

Sum tað sæst, so er tað nakað ymiskt, hvussu nógvar dystir liðini hava spælt higartil. Føroyar hava staðið seg væl. Leikliga avrikið og eisini úrslitið á heimavølli móti Andorra er helst tað minst jaliga, og nakað sum vónbrot var um í hópinum.

Hetta er tó eitt meira tekniskt Andorra-lið, ið mun til hvat vit kenna frá A-landsliðnum. Lagt er eisini upp til tættan dyst í kvøld. Veddingarfyritøkurnar hava Føroyar, sum higartil hava skorað minst tvey mál í hvørjum dysti, sum ein heilt lítlan favoritt.

Les eisini: Eyðun Klakstein: - Nú fara vit eftir góða úrslitinum í Andorra

Um tað eydnast at vinna í kvøld, so kunnu Føroyar fyribils av álvara blanda seg í stríðnum um 2. plássið. Hetta gevur atgongd til EM-endaspælið. Fleiri tyngri uppgávur eru tó á skránni seinni. Í kvøld spælir Grikkaland í Portugal, og Kroatia tekur ímóti Hvítarusslandi

Eyðun Klakstein og Atli Gregersen hava havt góða tíð at fyrireika liðið, sum er fullmannað, fyriuttan Samuel Johansn Chukwudi og Martin Agnarsson, ið framvegis eru skaðadarvaðir.

Teir fyrstu ellivu í fyrra dystinum móti Andorra. Í mun til tá, verður helst bert Martin Agnarsson (nr.17) ikki millum teir í kvøld - Ási Dam verður á vinstra bakki (Mynd: Sverri Egholm)

Rás 1 hjá Televarpinum vísir dystin, sum byrjar klokkan 19.