Leicester gav Manchester City eina hjálpandi hond

Fýra teir seinastu dystirnir í 24.umfari í Premier League vórðu leiktir í kvøld.

Í Anfield kundi Liverpool økja um leiðsluna í oddinum eftir at City í gjár yvirraskandi tapti í Newcastle. Tað byrjaði eisini sera væl hjá oddaliðnum, tí longu í 3. minutti var Saido Mané á blettinum. Men Leicester hevur argað topp-seks liðini í ár, og í yvirtíðini í 1. hálvleiki javnaði Harry Maguire. 

Liverpool hevði bóltin nógv meira, men hevði ilt við at skapa opnar málmøguleikar. Tað endaði 1-1 og harvið er munurin ímillum liðið hjá Klopp og liðið hjá Guardiola nú fimm stig. 

Tottenham er tættast uppá hesi bæði liðini, og við sigrinum á Watford í kvøld hava Pochettino og hansara menn bert tvey stig upp til City. Tottenham er annars uttan m.a. Harry Kane og Dele Alli, og Watford kom á odda undan steðginum. Men afturkomni Son javnaði tíggju minuttir fyri tíð, og í 87.minutti sló avloysarin hjá Kane, Fernando Llorente til. 

Í Suðuronglandi vísti Bournemouth, at liðið er komið í gongd aftur. Chelsea var á vitjan, og annað árið á rað taptu teir bláu úr London stórt har. Tað var annars 0-0 í hálvleikinum, men í 2. hálvleiki raplaði tað inn hjá Kepa, og Bournemouth vann 4-0. Chelsea, sum hevði Gonzalo Higuain í byrjanaruppstillingini, er nú ájavnt í stigum við Arsenal, og United andar liðið hjá Sarri í nakkan í stríðnum um 4. plássið.

Úrslit í Premier League í kvøld:
Bournemouth - Chelsea 4-0 (0-0)
Southampton - Crystal Palace 1-1 (0-1)
Liverpool - Leicester 1-1 (1-1)
Tottenham - Watford 2-1 (0-1)

Úrslit í Premier League í gjár
Manchester United - Burnley 2-2
Arsenal - Cardiff City 2-1
Fullham - Brighton & Hove Albion 4-2
Huddersfield - Everton 0-1
Wolverhampton - West Ham United 3-0
Newcastle United - Manchester City 2-1

Premier League støðan eftir 24 umfør