Lene Terp fingið hjálparvenjara afturat sær

Nú er greitt, hvørji manna venjaratoymið hjá A-landsliðnum við kvinnum

FSF setti síðst í januar Lene Terp sum høvuðsvenjara á kvinnulandsliðnum, og nú verður kunngjørt hvørji fólk hon fær í toymið.

Fótbóltssamband Føroya hevur gjørt avtalu við Christian Høgna Jacobsen, hjálparvenjara, Jákup Mikkelsen, málmansvenjara og Eli Nolsøe Leifsson, fysiskan venjara, sum saman við Lene Bjerning Terp manna venjaratoymið hjá A-landsliðnum við kvinnum. 

Meðan Jákup Mikkelsen og Eli Nolsøe Leifsson báðir hava verið við landsliðnum seinastu árini, so er uppgávan sum hjálparvenjari ein nýggj avbjóðing fyri Christian Høgna Jacobsen.

– Hetta er ein stórur og spennandi møguleiki, sum eg eri glaður fyri at hava fingið. Tað eru ikki allir venjarar, sum sleppa at arbeiða við einum A-landsliði, og so eri eg eisini glaður fyri at sleppa at arbeiða saman við Lene og hinum í venjaratoyminum. Lene er ein stór íblástrarkelda við drúgvum royndum, og so sær hon fleiri ting, sum vit kanska ikki hava givið okkum far um. Tað er ótrúliga spennandi og læruríkt at vera partur av, sigur Christian Høgni Jacobsen við heimasíðuna hjá FSF. 

Hópurin var á venjingarlegu í Føroyum í februar mánaða, og tá var sama venjaratoymið rundanum liðið eisini við. Landsliðið hittist aftur til venjing seinni í hesum mánaðinum, og síðst í apríl verður lutakastið til HM undankappingina, sum byrjar í heyst.